អ.ស.ប អាចចូលទៅស៊ើបអង្កតជុំវិញការប្រើអាវុធគីមីនៅក្នុងប្រទេសស៊ីរី
នៅ ទីបំផុត កិច្ចព្រមព្រៀងមួយត្រូវបានរកឃើញហើយរវាងអង្គការសហប្រជាជាតិ និងរដ្ឋាភិបាលនៃប្រទេសស៊ីរីស្តីពីការអនុញ្ញាតឲ្យក្រុមអធិការរបស់ អង្គការសហប្រជាតិអាចចូលទៅធ្វើការស៊ើបអង្កេតជុំវិញការប្រើប្រាស់ អាវុធគីមីជាយថាហេតុពីសំណាក់រដ្ឋាភិបាលស៊ីរី។ យោងតាមកិច្ចព្រមព្រៀង ក្រុមអធិការរបស់ អ.ស.ប ដែលបានបង្កើតឡើងក្នុងខែមីនាកន្លងទៅនឹងអាចធ្វើដំណើរទៅកាន់ ប្រទេសស៊ីរីនាពេលឆាប់ៗខាងមុខ។ ក៏ប៉ុន្តែ បេសកកម្មស៊ើបអង្កេតរបស់ក្រុមនេះនឹងត្រូវមានដែនកំណត់។
តាមពិតទៅ បេសកកម្មស៊ើបអង្កេតរបស់អង្គការសហប្រជាជាតិស្តីពីការប្រើប្រាស់ អាវុធគីមីនៅក្នុងប្រទេសស៊ីរីត្រូវបានចរចាតំាងតែពីខែមីនាមក ម្ល៉េះ។ ក៏ប៉ុន្តែ កិច្ចព្រមព្រៀងដែលទើបទទួលបានហាក់ដូចជានៅមានលក្ខណៈស្តួចស្តើង និងមានដែនកំណត់នៅឡើយ។ ស្តួចស្តើង និងមានដែនកំណត់ ព្រោះថា ក្រុមអធិការរបស់អង្គការសហប្រជាជាតិត្រូវបានរដ្ឋាភិបាលស៊ីរីអនុញ្ញាត ឲ្យទៅត្រួតពិនិត្យតែទីតំាងចំនួន ៣កន្លែងប៉ុណ្ណោះ។
ក្នុងចំណោមទីតំាងទំាង ៣កន្លែងនោះ មានតែមួយកន្លែងគត់ដែលត្រូវបានគេប្រាប់ឲ្យដឹងជាសាធារណៈ នោះគឺស្រុក Khan Al-Assal ស្ថិតក្បែរទីក្រុង Alep ដែលក្រុមប្រឆំាង និងរដ្ឋាភិបាលបានចោទគ្នាទៅវិញ ទៅមកក្នុងការប្រើប្រាស់អាវុធគីមី។ ការអនុញ្ញាតឲ្យចូលទៅស៊ើបអង្កេតលើទីតំាងចំនួន ៣កន្លែង គឺតិចតួចណាស់ ព្រោះថា អង្គការសហប្រជាជាតិមានការសង្ស័យមិនតិចជាង ១៣កន្លែងទេដែលមានឩប្បវហេតុនៃការប្រើប្រាស់អាវុធគីមី។ យ៉ាងណាក៏ដោយ ក្រុមអធិការរបស់អង្គការសហប្រជាជាតិដែលដឹកនំាដោយជនជាតិស៊ុយអែតលោក Ake Sellstrom នឹងត្រូវធ្វើដំណើរទៅកាន់ប្រទេសស៊ីរីនានាពេលឆាប់ៗខាងមុខ។
គួរជម្រាបជូនថា នៅពេលទើបបានតែងតំាងដំបូង លោក Ake Sellstrom បានប្រាប់ឲ្យដឹងថា ស្លាកស្នាមសល់ពីការប្រើប្រាស់អាវុធគីមីមានរយៈពេលមិនលើសពី ៣ខែទេ។ ឥឡូវនេះ ព្រឹត្តិការណ៍ដែលបានកើតមានឡើងនៅក្នុងស្រុក Khan Al-Assal មានរយៈពេលជាង ៤ខែមកហើយ។ ដូច្នេះ គេពិតជាពិបាកនឹងរកឃើញភស្តុតាងដែលនៅសេសសល់ណាស់៕ដោយ គួច គន្ធារ៉ា (RFI)
