រថភ្លើងស្វ៊ីសពីរបរបុកគ្នា ស្លាប់ម្នាក់ របួស៣៥នាក់
នៅប្រទេសស្វ៊ីស កាលពីថ្ងៃចន្ទម្សិលមិញ រថភ្លើងដឹកអ្នកដំណើរពីរគ្រឿងបរមកពីទិសបញ្ច្រាសគ្នា បានបុកក្បាលគ្នា បង្កជាគ្រោះថ្នាក់ធ្វើអោយអ្នកបើកបររថភ្លើងម្នាក់ស្លាប់ និងមនុស្ស៣៥នាក់ទៀតរងរបួស។ គ្រោះថ្នាក់នេះបានកើតឡើង នៅភូមិ Granges-près-Marnand ឃុំ Vaud ភាគខាងលិចប្រទេស។ គេនៅមិនទាន់អាចសន្និដ្ឋានបានពីមូលហេតុពិតប្រាកដនៃគ្រោះថ្នាក់ នេះនៅឡើយ។ ក្រុមស៊ើបអង្កេតកំពុងបន្តការងាររបស់ខ្លួន។
គ្រោះថ្នាក់ នេះបានកើតឡើង ក្នុងថ្ងៃចន្ទម្សិលមិញ នៅម៉ោង៧យប់ ក្នុងស្រុក។ រថភ្លើងទាំងពីរធ្វើដំណើរមកពីទិសបញ្ច្រាសគ្នា។ រថភ្លើងមួយចេញដំណើរមកពីក្រុង Lausane ភាគខាងលិចប្រទេសស្វ៊ីស នៅពេលដែលរថភ្លើងមួយទៀត ត្រូវធ្វើដំណើរទៅក្រុងនោះ ជាហេតុនាំអោយបុកគ្នា។ អ្វីដែលគួរអោយកត់សម្គាល់នោះគឺថា បើយោងតាមផ្នែកផ្លូវដែកស្វ៊ីស រថភ្លើងទាំងពីរបរនៅលើផ្លូវតែមួយ ហេតុនេះហើយទើបបុកគ្នាបែបនេះ។ តាមធម្មតា រថភ្លើងទាំងពីរនេះ ត្រូវបរមកជួបគ្នាក្បែរស្ថានីយ៍ភូមិ Granges-près-Marnand។
ផ្នែក ស៊ើបអង្កេតគ្រោះថ្នាក់ចរាចរ និងផ្នែកអាវុធហត្ថស្វ៊ីស កំពុងតែបន្តការងាររបស់ខ្លួន ដើម្បីស្វែងរកមូលហេតុពិតប្រាកដនៃគ្រោះថ្នាក់នេះ។ អ្នកបើកបររថភ្លើងម្នាក់ បានបាត់បង់ជីវិត ហើយមនុស្ស២៦នាក់ ត្រូវបានគេបញ្ជូនទៅមន្ទីរពេទ្យ។ ប៉ុន្តែពួកគេគ្មានគ្រោះថ្នាក់ដល់អាយុជីវិតនោះទេ។ គួរបញ្ជាក់ថា នៅពេលកើតហេតុការណ៍នោះ អ្នកដំណើរសរុបក្នុងរថភ្លើងទាំងពីរ មាន៤៦នាក់។
ហេតុការណ៍រថភ្លើងបុកគ្នាបែបនេះ ប្រទេសស្វ៊ីសធ្លាប់ស្គាល់ច្រើនលើកមកហើយ។ កាលពីខែមករាកន្លងទៅ នៅភាគខាងជើងប្រទេស គ្រោះថ្នាក់រថភ្លើងបុកគ្នាមួយបាន បង្កអោយរបួសមនុស្ស២៥នាក់។ ហើយកាលពីឆ្នាំ២០០៣ គ្រោះថ្នាក់រថភ្លើងបុកគ្នាមួយទៀតដែរ បានបង្កអោយរបួសមនុស្ស៤៥នាក់ នៅZurich។
រយៈពេលថ្មីៗនេះ មានគ្រោះថ្នាក់អ្នកដំណើរជាច្រើនបានកើតឡើង នៅអឺរ៉ុប។ នៅបារាំង កាលពីថ្ងៃ១២កក្កដា រថភ្លើងមួយបានបររបូតចេញពីផ្លូវដែក ធ្វើអោយមានមនុស្សស្លាប់៧នាក់។ បន្ទាប់មកទៀត នៅថ្ងៃ២៤កក្កដា រថភ្លើងមួយនៅអេស្ប៉ាញ បានបរហួសល្បឿនកំណត់ របូតចេញពីផ្លូវ បង្កអោយមានមនុស្សស្លាប់៧៩នាក់។ ហើយកាលពីថ្ងៃអាទិត្យកន្លងទៅ ឡានដឹកអ្នកដំណើរធំមួយនៅអ៊ីតាលី បានបរបុករថយន្តជាច្រើននៅលើស្ពានមួយកន្លែង បណ្តាលអោយមានមនុស្សស្លាប់៣៨នាក់៕ដោយ ព្រំ សឿន សូលីណា (RFI)
