គណបក្សប្រជាជនកម្ពុជា ផ្សាយថាខ្លួនទទួលបានអាសនៈចំនួន៦៨
ភ្នំពេញ៖ គណបក្សប្រជាជនកម្ពុជា ឲ្យដឹងថា ខ្លួនទទួលបានអាសនៈរដ្ឋសភាចំនួន៦៨ ក្នុងចំណោមអាសនៈ១២៣ សម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៥ នៅថ្ងៃអាទិត្យនេះ។
ចំណែក គណបក្សសង្គ្រោះជាតិ ដែលដឹកនាំដោយលោក សម រង្ស៊ី និងលោកកឹម សុខា ទទួលអាសនៈចំនួន៥៥។ នេះជាលទ្ធផលបោះឆ្នោតបណ្តោះអាសន្ន ដែលគណបក្សប្រជាជនកម្ពុជា បានផ្សឮ្វផ្សាយនៅលើគេហទំព័ររបស់ខ្លូន ប៉ុន្មានម៉ោងក្រោយការបោះឆ្នោត ពោលគឺដូចទៅនឹងលទ្ធផលបណ្តោះអាសន្ន ដែលលោករដ្ឋមន្ត្រីក្រសួងព័ត៌មាន និងជាអ្នកនាំពាក្យរដ្ឋាភិបាល លោក ខៀវ កាញារីទ្ធ បានសរសេរឲ្យដឹងនៅលើបណ្តាញសង្គមហ្វេសប៊ុក (Facebook) របស់លោក។
ការផ្សាយលទ្ធផលបណ្តោះអាសន្ននេះធ្វើទ្បើង ស្របពេលដែលលទ្ធផលបោះឆ្នោតបណ្តោះអាសន្ន របស់គណៈកម្មាធិការជាតិរៀបចំការបោះឆ្នោត (គ.ជ.ប) ត្រូវបានប្រកាសឲ្យដឹងដោយទូរទស្សន៍ជាតិកម្ពុជា (ទទក) ប៉ុន្តែមិនទាន់បានបូកសរុបអាសនៈនៅទ្បើយទេ។
ផ្ទុយទៅវិញ លទ្ធផលបណ្តោះអាសន្នរបស់គណបក្សប្រជាជនកម្ពុជា បង្ហាញថា អាសនៈសភារបស់គណបក្សនេះ ធ្លាក់ចំនួន២២អាសនៈ ពោលគឺពី៩០ មក៦៨។ នេះជាលើកទីមួយហើយ ដែលអាសនៈសភាគណបក្សកាន់អំណាច របស់លោកនាយករដ្ឋមន្ត្រីហ៊ុន សែន ដែលបានដឹកនាំប្រទេសជិត៣០ឆ្នាំមកហើយ ធ្លាក់ចុះ។
កាលពីការបោះឆ្នោតជ្រើសតាំងតំណាងរាស្ត្រ នីតិកាលទី១ ឆ្នាំ១៩៩៣ ដែលរៀបចំដោយអាជ្ញាធរបណ្តោះអាសន្ន នៃអង្គការសហប្រជាជាតិប្រចាំនៅកម្ពុជា គណបក្សប្រជាជនកម្ពុជា ទទួលបានអាសនៈចំនួន៥៤។ នៅឆ្នាំ១៩៩៨ គណបក្សប្រជាជនកម្ពុជា ទទួលបាន៦៣ និងនៅឆ្នាំ២០០៣ ទទួលបាន៧៣អាសនៈ។ នៅឆ្នាំ២០០៨ អាសនៈសភារបស់គណបក្សប្រជាជនកម្ពុជា បានកើនរហូតដល់៩០អាសនៈ។
លទ្ធផលបណ្តោះអាសន្ននេះ បង្ហាញថា គណបក្សប្រជាជនកម្ពុជា អាចបង្កើតរដ្ឋាភិបាលតែឯងបាន ដោយប្រើសំទ្បេង៥០បូក១ ដោយស្របទៅនឹងរដ្ឋធម្មនុញ្ញដែលត្រូវបានធ្វើវិសោធនកម្មឆ្នាំ២០០៦។
គ.ជ.ប នឹងប្រកាសលទ្ធផលផ្លូវការ នៃការបែងចែកអាសនៈ និងកំណត់បេក្ខជនជាប់ឆ្នោត (តាមករណីមាន ឬគ្មានពាក្យបណ្តឹង និងករណីគ្មានការបោះឆ្នោតសារជាថ្មី) ពីថ្ងៃទី១៤ ខែសីហា ដល់ថ្ងៃទី០៨ ខែកញ្ញា ឆ្នាំ២០១៣៕ Cambodia News
