Edward Snowden ដាក់ពាក្យជាផ្លូវការសុំសិទ្ធិជ្រកកោនបណ្តោះអាសន្ននៅរុស្ស៊ី
នៅទីបំផុត អតីតបុគ្គលិកបំរើការទីភ្នាក់ងារសំងាត់អាមេរិកសេអ៊ីអា Edward Snowden បានដាក់ពាក្យជាផ្លូវការ នៅថ្ងៃអង្គារនេះ ទៅអាជ្ញាធររុស្ស៊ី ដើម្បីសុំសិទ្ធិជ្រកកោនបណ្តោះអាសន្ននៅក្នុងប្រទេសនេះ។ Edward Snowden ធ្លាប់បានសុំសិទ្ធិជ្រកកោនទៅប្រទេសជាង២០មកហើយ ក្នុងនោះក៏មានរុស្ស៊ីផងដែរ។ ប៉ុន្តែ ពុំដែលបានធ្វើសំណើសុំជាផ្លូវការទៅរុស្ស៊ីនោះទេ។
នៅថ្ងៃអង្គារនេះ ពាក្យសុំសិទ្ធិជ្រកកោនបណ្តោះអាសន្នរបស់ Edward Snowden ត្រូវបានប្រគល់ទៅអោយអ្នកទទួលខុសត្រូវ នៅផ្នែកសេវាអន្តោប្រវេសន៍រុស្ស៊ី ជាផ្លូវការហើយ។ នេះបើយោងតាមលោក Anatoli Koutcherena ដែលជាមេធាវីរបស់ជនជាតិអាមេរិកាំងរូបនេះ។ ផ្នែកអន្តោប្រវេសន៍រុស្ស៊ីបានប្រាប់អោយដឹងថា ការសិក្សាលើសំណើសុំរបស់ Snowden អាចចំណាយពេលរហូតដល់បីខែឯណោះ។ ក្នុងរយៈពេលរង់ចាំនេះ Edward Snowden នឹងទទួលបានឯកសារអនុញ្ញាតអោយរូបគេបានចូលក្នុងទឹកដីរុស្ស៊ី។
លោក Dmitri Peskov អ្នកនាំពាក្យប្រធានាធិបតីរុស្ស៊ី បានរំលឹកឡើងវិញថា វិមានក្រេមឡាំងមិនលូកដៃចូលក្នុងកិច្ចការនេះទេ។ គឺខាងផ្នែកអន្តោប្រវេសន៍ប៉ុណ្ណោះ ដែលជាអ្នកទទួលបន្ទុកលើសំណើសុំរបស់បុរសអាមេរិកាំងរូបនេះ។
អស់រយៈពេលជាងបីសប្តាហ៍មកហើយ ដែល Edward Snowden ជាប់ខ្លួននៅឯអាកាសយានដ្ឋានរុស្ស៊ី Moscou-Cheeremetievo។ កាលពីថ្ងៃសុក្រសប្តាហ៍មុន ក្នុងឧកាសជួបជាមួយក្រុមសិទ្ធិមនុស្ស និងមេធាវីនានា Edward Snowden បានប្រាប់ថា ខ្លួនចង់សុំសិទ្ធិជ្រកកោននៅរុស្ស៊ីសិន មុននឹងធ្វើដំណើរទៅកាន់ប្រទេសវេណេស៊ុយអេឡា នៅអាមេរិកឡាទីន។
កាលពីថ្ងៃចន្ទកន្លងមក ប្រធានាធិបតីរុស្ស៊ី លោក Vladimir Poutine បានរំលឹកឡើងវិញ ថារុស្ស៊ីចង់អោយ Snowden ស្ថិតនៅក្នុងទឹកដីរបស់ខ្លួន ប៉ុន្តែ Snowden ត្រូវតែឈប់ទំលាយព័ត៌មានស្តីពីកម្មវិធីត្រួតពិនិត្យសារ អេឡិកត្រូនិករបស់សហរដ្ឋអាមេរិកតទៅទៀត ដើម្បីចៀសវាងប៉ះពាល់ទំនាក់ទំនងរវាងរុស្ស៊ីនិងអាមេរិក៕ដោយ ព្រំ សឿន សូលីណា (RFI)
