ស្ថានភាពអ្នកកាសែតកម្ពុជាប្រសើរតែនៅ តែទទួលការគំរាមកំហែង
របាយការណ៍ពីស្ថានភាពអ្នកកាសែតកម្ពុជា ត្រូវបានផ្សព្វផ្សាយ នៅថ្ងៃប្រារព្ធទិវាសេរីភាពសាព័ត៌មានពិភពលោក ថ្ងៃ៣ ឧសភា ២០១២ បានបង្ហាញថា ក្នុងរយៈពេលមួយឆ្នាំ គិតចាប់ពីថ្ងៃ៣ឧសភា ២០១១ មកដល់ថ្ងៃ៣ ឧសភា ២០១២ មានអ្នកកាសែតកម្ពុជា ៧ នាក់ ត្រូវបានចាប់ខ្លួន ខណៈដែលឆ្នាំមុនមាន ១០ នាក់។ ដោយឡែកបណ្តឹងប្រឆាំងអ្នកកាសែតនៅកម្ពុជា មានចំនួន ៩ ករណី កាលពីឆ្នាំ២០១០ តែនៅឆ្នាំ២០១១ បានថយចុះ មកនៅត្រឹម ៤ ករណី។
ការប្តឹងផ្តល់នោះ ចោទប្រកាន់ពីបទផ្សាយព័ត៌មានមិនពិត និងបទបរិហារកេរ្តិ៍ តាមរយៈការចុះផ្សាយអត្ថបទព័ត៌មាន។ អ្នកកាសែត ដែលរងការប្តឹងផ្តល់ ស្ថិតនៅក្នុងកាសែត ដែលគាំទ្ររដ្ឋាភិបាល រួមមាន៖ កាសែតរស្មីកម្ពុជា កម្ពុជាថ្មី និងកាសែតកោះសន្តិភាព ជាដើម។ រីឯកាសែតប្រឆាំង មិនរងការប្តឹងផ្តល់ទេ។ចំណែកករណីគំរាមកំហែង កាលពីឆ្នាំ២០១០ មាន ៧ ករណី តែនៅឆ្នាំ២០១១ បានថយមកនៅត្រឹម ៥ ករណី។
ថ្លែងនៅក្នុងពិធីលោក ខៀវ កាញារីទ្ធ រដ្ឋមន្ត្រីក្រសួងព័ត៌មានបាននិយាយថា ការជួបជុំនៅថ្ងៃប្រារព្ធទិវាសារព័ត៌មានពិភពលោក ថ្ងៃ៣ឧសភានេះ ដើម្បីធ្វើយ៉ាងណា លើកតម្កើងវិជ្ជាជីវៈសារព័ត៌មានឲ្យមានការទទួលខុសត្រូវ និងផ្តាំផ្ញើដល់អ្នកកាសែតឲ្យប្រយ័ត្នប្រយែងចំពោះការអនុវត្តវិជ្ជាជីវៈជាអ្នកសារព័ត៌មានប្រកបដោយវិជ្ជាជីវៈ។
អង្គការអ្នកកាសែតគ្មានព្រំដែន បានបង្ហាញក្នុងរបាយការណ៍របស់ខ្លួនផងដែរថា ក្នុងចំណោម ១៧៩ប្រទេស កម្ពុជាឈរនៅចំណាត់ថ្នាក់ទី ១១៧ ផ្នែកសេរីភាពសារព័ត៌មាន។ បើប្រៀបធៀបនឹងបណ្តាប្រទេសអាស៊ានទាំង ១០ កម្ពុជាមានចំណាត់ថ្នាក់សេរីភាពសារព័ត៌មានល្អប្រសើរជាងគេ៕
