ក្រុមភាតរអ៊ីស្លាមអេហ្ស៊ីបអំពាវនាវអោយងើបបះបោរប្រឆាំងកងទ័ព
នៅប្រទេសអេហ្ស៊ីប មានមនុស្សយ៉ាងហោចណាស់៥១នាក់ បានបាត់បង់ជីវិតនៅក្នុងការប្រឈមមុខរវាងកងទ័ពនិងក្រុមបាតុករ គាំទ្រអតីប្រធានាធិបតីមរស៊ី នៅព្រឹកថ្ងៃចន្ទនេះ។ ក្រុមភាតរអ៊ីស្លាមបានចោទកងទ័ពអេហ្ស៊ីបថាជាអ្នកសម្លាប់ក្រុម បាតុករ ហើយបានអំពាវនាវអោយមានការងើបបះបោរប្រឆាំងនឹងកងទ័ពវិញ។ ប្រធានាធិបតីស្តីទី Aldy Mansour បានចេញបញ្ជាអោយស៊ើបអង្កេតលើអំពើហិង្សានៅថ្ងៃចន្ទនេះ។ ប្រទេសកាតារ អ៊ីរ៉ង់ និងសហភាពអឺរ៉ុបបានធ្វើការបរិហារថ្កោលទោសអំពើហិង្សានេះ។ សហភាពអឺរ៉ុបបានប្រាប់ថាខ្លួនប្រហែលជាអាចផ្លាស់ប្តូរគោលការ ជំនួយដែលត្រូវផ្តល់អោយអេហ្ស៊ីប។
ដោយសារ តែចង់បង្ក្រាបបាតុករគាំទ្រអតីតប្រធានាធិបតីមរស៊ី ដែលខ្លួនបានផ្តួលពីតំណែងកាលពីថ្ងៃពុធសប្តាហ៍មុននេះ កងទ័ពអេហ្ស៊ីបបានផុងខ្លួនបង្កអោយមានមនុស្សស្លាប់ច្រើននាក់ នៅក្រុងគែរ នៅព្រឹកថ្ងៃចន្ទដើមសប្តាហ៍នេះ។ កងទ័ពបានប្រាប់ថា ខ្លួនចង់បង្ក្រាបក្រុមភេរវជនដែលវាយលុកអគារអង្គរក្សការពារ ប្រធានាធិបតី។ ប៉ុន្តែក្រុមភាតរអ៊ីស្លាមដែលគាំទ្រលោកមរស៊ី បានចោទទៅវិញថា ទង្វើនេះជាការធ្វើឃាតលើបាតុករដែលមិនបានប្រើហិង្សាអ្វីសោះ។ ក្រុមភាតរអ៊ីស្លាមបានអំពាវនាវអោយមានការបះបោរប្រឆាំងនឹងកងទ័ព អេហ្ស៊ីប។ ក្រុមភាតរអ៊ីស្លាមចាត់ទុកកងទ័ពថា ជាជនក្បត់បំពានលទ្ធិប្រជាធិបតេយ្យ។
អំពើ ហិង្សាបានធ្វើអោយគណបក្សអភិរក្សនិយមអ៊ីស្លាមអាល់ណួ ជាគណបក្សសំខាន់ទីពីរនៅអេហ្ស៊ីប ដកខ្លួនចេញពីកិច្ចពិភាក្សាក្នុងការបង្កើតរដ្ឋាភិបាលអន្តរកាល។ ប្រធានាធិបតីស្តីទី Aldy Mansour បានសំដែងការសោកស្តាយចំពោះអំពើហិង្សាដែលបានកើតឡើង ហើយបានចេញបញ្ជាអោយមានការស៊ើបអង្កេត។ ប៉ុន្តែ លោក ម៉ាន់សួរ បានបន្តថា អំពើហិង្សានេះមិនប៉ះពាល់ដល់កិច្ចប្រឹងប្រែងបង្កើតរដ្ឋាភិបាល អន្តរកាលនោះទេ។ ដោយឡែក អាល្លឺម៉ង់ចង់អោយមានអាជ្ញាធរឯករាជ្យមួយធ្វើការស៊ើបអង្កេត លើអំពើហិង្សាអោយបានឆាប់រហ័ស។
អំពើហិង្សានៅថ្ងៃចន្ទនេះ បានបង្កជាប្រតិកម្មថ្កោលទោសពីបណ្តាប្រទេសជាច្រើនដូចជា អ៊ីរ៉ង់ កាតារ និងសហភាពអឺរ៉ុបជាដើម។ ប្រទេសកាតារជំរុញអាជ្ញាធរអេហ្ស៊ីបអោយការពារបណ្តាបាតុករ អហិង្សា និងអនុញ្ញាតអោយពួកគេមានសិទ្ធិបញ្ចេញមតិយោបល់។ នៅក្រុងសាណា ប្រទេសយេមេន មនុស្សរាប់ពាន់នាក់បាននាំគ្នាបាតុកម្មគាំទ្រអតីតប្រធានាធិបតីមរស៊ី ទៅតាមការអំពាវនាវរបស់គណបក្សអ៊ីស្លាម អាល់អ៊ីស្លា ដែលមានវត្តមានក្នុងរដ្ឋាភិបាលយេមេន។
ទន្ទឹមនេះដែរ សហភាពអឺរ៉ុបបានប្រាប់ថា ខ្លួនប្រហែលជាអាចផ្លាស់ប្តូររបៀបរបបផ្តល់ជំនួយដល់អេហ្ស៊ីប។ សហភាពអឺរ៉ុបនឹងសិក្សាជាអចិន្ត្រៃយ៍នូវជំនួយនេះ ទៅតាមស្ថានការនយោបាយជាក់ស្តែង។ ប៉ុន្តែ បញ្ជាក់ថាខ្លួនមិនផ្តល់ជំនួយដល់រដ្ឋាភិបាលបណ្តោះអាសន្ន អេហ្ស៊ីបទេ ព្រោះថាកំណែទម្រង់ការងាររដ្ឋាភិបាល នេះនៅមានការយឺតយ៉ាវ។ គួររំលឹកថា សហភាពអឺរ៉ុបមានគំរោងផ្តល់ជំនួយជិត៥ពាន់លានអឺរ៉ូ ក្នុងទម្រង់ជាប្រាក់កំចីរឺក៏ជាប្រាក់អំណោយដល់អេហ្ស៊ីបក្នុង កំឡុងឆ្នាំ២០១២-២០១៣៕ដោយ ព្រំ សឿន សូលីណា (RFI)
