អតីតអ្នកបុរីកីឡា តវ៉ាបិទផ្លូវចូលសាលារាជធានីភ្នំពេញ
Cambodia News
ភ្នំពេញ៖ នៅថ្ងៃទី៨ ខែកក្កដា អតីតអ្នកបុរីកីឡាប្រមាណជា១០០នាក់ តំណាងឲ្យ៥០គ្រួសារ បានតវ៉ាបិទផ្លូវ ចូលសាលារាជធានីភ្នំពេញ ដើម្បីសុំឲ្យអភិបាលរាជធានីភ្នំពេញ លោក ប៉ា សុជាតិវង្ស ចេញមុខដោះស្រាយបញ្ហាជូនពួកគេ។
អ្នកតវ៉ាបានត្អូញត្អែរថា ការរស់នៅរបស់ពួកគេ ជួបការលំបាក ដោយរស់នៅក្រោមតង់ ជិតសំរាម និងធ្លាក់ខ្លួនឈឺ។ អ្នកតវ៉ា បានលើកបដា ដោយទាមទារឲ្យក្រុមហ៊ុនផានអ៊ីម៉ិច ដោះស្រាយបញ្ហា ដោយគោរពតាមការសន្យាកាលពីឆ្នាំ២០០៤ និងទាមទារឲ្យអភិបាលរាជធានី ជួយផ្តល់ស្បៀងអាហារ និងចេញមុខមកដោះស្រាយ។
អ្នកតវ៉ាអះអាងថា ពួកគេ៤៥គ្រួសារក្នុងចំណោម ១០៧គ្រួសារ មិនទាន់បានទទួលសំណងពីក្រុមហ៊ុនផានអ៊ីម៉ិច ហើយកំពុងរស់នៅកន្លែងចាស់ ដែលពួកគាត់ធ្លាប់រស់នៅមុនពេលក្រុមហ៊ុនបានបណ្ដេញចេញកាលពីដើម ឆ្នាំ២០១២៕
