ការចូលរួមរបស់យុវជននឹងធ្វើឲ្យមានការប្រែប្រួល
Cambodia News
ភ្នំពេញៈ ការចូលរួមយ៉ាងច្រើន និងយ៉ាងផុលផុស របស់យុវជនវ័យក្មេង នៅក្នុងយុទ្ធនាការឃោសនាបោះឆ្នោត របស់គណបក្សនយោបាយដែលកំពុងតែប្រព្រឹត្តទៅនាពេលនេះ ត្រូវបានអ្នកវិភាគយល់ថា អាចនឹងធ្វើឲ្យលទ្ធផលនៃការបោះឆ្នោត នៅចុងខែកក្កដានេះមានការប្រែប្រួលខ្លាំងហួសពីការស្មាន។
ចំពោះការចូលរួមរបស់ក្រុមយុវជន លោក ទេព នីថា អគ្គលេខាធិការនៃគណៈកម្មាធិការជាតិរៀបចំការបោះឆ្នោត គ.ជ.ប បានថ្លែងក្នុងកិច្ចប្រជុំជាមួយគណបក្សពីម្សិលមិញថា ការចូលរួមដង្ហែក្បួនរបស់ពួកគេ បានបង្កឲ្យមានភាពស្មុគស្មាញ ដោយពួកគេបើក ម៉ូតូហែក្បួននៅពេលយប់ ដែលបណ្តាលឲ្យប៉ះពាល់ដល់សណ្តាប់ធ្នាប់សង្គមនិងសណ្តាប់ធ្នាប់ និងបំពានលើច្បាប់ចរាចរណ៍ចរាចរណ៍។
លោក ហូ វ៉ាន់ បេក្ខជនតំណាងរាស្ត្ររបស់គណបក្សសង្គ្រោះជាតិ បានថ្លែងថា អ្វីដែល គ.ជ.ប បានលើកឡើងគឺជាការរារាំងសកម្មភាពដង្ហែក្បួនឃោសនាជាពិសេសការចូល រួមរបស់យុវជន នៅពេលដែលយុវជនជាច្រើនបានចូលរួមជាមួយគណបក្សលោក។
លោកជួន សុវណ្ណ ស្នងការនគរបាលរាជធានីភ្នំពេញ បានលើកឡើងថា វាមានភាពស្មុគស្មាញមួយចំនួនខណៈកំពុងមានយុទ្ធនាការឃោសនាបោះឆ្នោត នាពេលបច្ចុប្បន្ននេះ ព្រោះគណបក្សនយោបាយមួយចំនួន មិនគោរពច្បាប់ និងបទប្បញ្ញត្តិផ្សេងៗ ជាពិសេសពាក់ព័ន្ធនឹងទីតាំងប្រមូលផ្តុំ និងទិសដៅហែ។
យ៉ាងណាក៏ដោយ លោកកែម ឡី អ្នកវិភាគនយោបាយឯករាជ្យ បានចាត់ទុកការចូលរួមរបស់យុវជន ថាជាការល្អប្រសើរ។ លោកបញ្ជាក់ថា កាលពីមុន ក្រុមយុវជនដែលគាំទ្រគណបក្សប្រឆាំង មានការលាក់មុខលាក់មាត់ភ័យខ្លាច ប៉ុន្តែឥឡូវនេះ ពួកគេបានចូលរួមដោយបើកចំហ។
បើតាមលោក កែម ឡី ការចូលរួមយ៉ាងច្រើនរបស់យុវជនជាមួយគណបក្សនយោបាយលើកនេះ គឺមួយផ្នែកធំ តាមរយៈបណ្តាញព័ត៌មានសង្គមហ្វេសប៊ុក ដែលពួកគេអាចទាក់ទងចែករំលែកព័ត៌មានឲ្យគ្នា និងទទួលបានព័ត៌មានផ្សេងៗឆាប់រហ័ស៕
