ចិនមានកង្វល់ជុំវិញការវាយលុកលួចទិន្នន័យពីទីភ្នាក់ងារអាម៉េរិក
ប្រទេសចិននិយាយថា ខ្លួនមានកង្វល់យ៉ាងខ្លាំងជុំវិញការវាយលុកតាមប្រព័ន្ធអ៊ីនធើរណិត ធ្វើឡើងដោយទីភ្នាក់ងារមួយចំនួនរបស់រដ្ឋាភិបាលអាម៉េរិក។
កង្វល់ នេះបានចេញឡើងក្រោយពីមានការចោទប្រកាន់ក្នុងពេល ថ្មីៗ ដែលបានចេញឡើងដោយលោកEdward Snowden អ្នកវិភាគព័ត៌មានស៊ើបការណ៍សម្ងាត់របស់អាម៉េរិកដែលកំពុងរត់គេច ខ្លួន ក្រោយពីលោកបានបញ្ចេញឲ្យដឹងនូវកិច្ចការសម្ងាត់របស់រដ្ឋាភិបាល អាម៉េរិកក្នុងការលួចតាមដានព័ត៌មានតាមអ៊ីនធើរណិត។
លោក Eward Snowden បានប្រាក់កាសែត Sunday Morning Post នៅក្រុងហុងកុងថា ក្រុមចារកម្មអាម៉េរិកបានវាយលុកលួចចូលប្រព័ន្ធកុំព្យូទ័ររបស់សកល វិទ្យាល័យ Tsinghua ដ៏ល្បីរបស់ចិននៅក្រុងប៉េកាំង និងស្នាក់ការកណ្ដាលនៃក្រុមហ៊ុន Pacnet នៅក្រុងហុងកុង ដោយធ្វើឲ្យចរាចរណ៍តាមអ៊ីនធើរណិតនៅប្រទេសចិនមានការមមាញឹក។
លោក Eward Snowden ក៏បាននិយាយថា ភ្នាក់ងារសន្ដិសុខជាតិរបស់អាម៉េរិកបានវាយលុកលួចចូលក្រុមហ៊ុន ទូរស័ព្ទចល័តជាច្រើនរបស់ចិន ដើម្បីប្រមូលទិន្នន័យពីសារ SMS រាប់លានសារ។
ក្រសួងការបរទេសចិនបានដាក់ពាក្យសុំការពន្យល់ អំពីបញ្ហានេះជាមួយនឹងអាម៉េរិក ហើយក៏បានសម្ដែងឲ្យឃើញនូវឆន្ទៈផងដែរក្នុងការពង្រឹងការចរចា និងសហប្រតិបត្ដិការដើម្បីធានាឲ្យបាននូវសន្ដិភាព និងសុវត្ថិភាពនៅក្នុងពិភពអ៊ីនធើរណិត៕ (Radio Australia)
