ព្យុងយ៉ាងចង់យកគំរូដឹកនាំប្រទេសតាមអ៊ីត្លែរ
លោក គីម ជុងអ៊ុន អគ្គមគ្គុទេសក៍ដ៏ក្មេងខ្ចីរបស់កូរ៉េខាងជើង បានផ្តល់អំណោយជាសៀវភៅសរសេរពីប្រវត្តិដឹកនាំរបស់ អ៊ីត្លែរ ដែលមានចំណងជើងថា “Mein Kampf” ឬ “ការប្រយុទ្ធរបស់ខ្ញុំ” ទៅបណ្តាថ្នាក់ដឹកនាំជាន់ខ្ពស់កុម្មុយនិស្តជាច្រើន ដើម្បីដកស្រង់បទពិសោធន៍ដឹកនាំរបស់មហាហ្វាស៊ីសអ៊ីត្លែរអាល្លឺម៉ង់ យកមកអនុវត្តក្នុងប្រទេសកូរ៉េខាងជើង។ នេះបើយោងតាមព័ត៌មានផ្តល់ដោយក្រុមអ្នកផ្តាច់ខ្លួនពីរបប កុម្មុយនិស្តព្យុងយ៉ាង តាមប្រព័ន្ធអ៊ីនធ័រនែត។
“Mein Kampf” ឬ “ការប្រយុទ្ធរបស់ខ្ញុំ” បកប្រែស្អាតជាភាសាកូរ៉េ ហើយចែកចាយដល់បណ្តាថ្នាក់ដឹកនាំជាន់ខ្ពស់កុម្មុយនិស្ត នាឱកាសបុណ្យកំណើតរបស់លោក គីមជុងអ៊ុន កាលពីខែមករា។ នេះបើតាម New Focus International ដែលបានគូសបញ្ជាក់ថា អំណោយដ៏សំងាត់នេះ ទើបត្រូវបានអ្នកទទួលខុសកូរ៉េខាងជើងមិនបញ្ចេញឈ្មោះ ធ្វើការនៅចិន បង្ហើបឱ្យដឹង និងត្រូវបានសារព័ត៌មានកូរ៉េខាងត្បូងចុះផ្សាយបន្តនៅថ្ងៃពុធទី ១៩មិថុនានេះ។
បើតាមប្រភពដដែល លោក គីមជុងអ៊ុន បានបញ្ជាឱ្យថ្នាក់ដឹកនាំជាន់ខ្ពស់កូរ៉េខាងជើងទាំងអស់ សិក្សា និងពិចារណាឱ្យបានល្អិតល្អន់ រួចយកមកអនុវត្តតាម ក្នុងការដឹកនាំប្រទេស។ សម្រាប់លោក គីមជុងអ៊ុន ដែលមានជំនក់ចិត្តសិក្សាពីប្រវត្តិអ៊ីត្លែរ តាំងពីលោកនៅសិក្សានៅប្រទេសស្វីស បានលើកឡើងថា អ៊ីត្លែរអាចកសាងអាល្លឺម៉ង់ឱ្យមានមុខមាត់និងអំណាច ក្រោយបរាជ័យក្នុងសង្គ្រាមលោកលើកទីមួយបាន ក្នុងពេលដ៏ខ្លី ដូច្នេះកូរ៉េខាងជើងត្រូវចេះទាញយកគំរូដ៏ល្អនេះ។ តួនាទីដ៏សំខាន់របស់កីឡា ក្នុងបង្រួបបង្រួមប្រទេសអាល្លឺម៉ង់ ដែលពួកណាស្ហ៊ីបានរៀបគម្រោងឡើង ជាចំណុចលើកទឹកចិត្តដែលមេដឹកនាំកូរ៉េខាងជើង ត្រូវជំរុញឱ្យពលរដ្ឋកូរ៉េខាងជើងហ្វឹកហាត់កាយសម្បទា ធ្វើកីឡា។
សូមបញ្ជាក់ថា “Mein Kampf” ឬ “ការប្រយុទ្ធរបស់ខ្ញុំ” ត្រូវបានសរសេរឡើងដោយអ៊ីត្លែរ ពេលកំពុងជាប់ឃុំឃាំង ក្នុងឆ្នាំ១៩២៤ ក្រោយការប៉ុនប៉ងធ្វើរដ្ឋប្រហារ។ ខ្លឹមសារនៃសៀវភៅជាការរៀបរាប់ជីវប្រវត្តិផ្ទាល់ផង និងអំពីមនោគមន៍វិជ្ជាហ្វាស៊ីសរបស់ Adolf Hitlerផង។ ចាប់ពីឆ្នាំ១៩៣៦មក សៀវភៅនេះបានក្លាយជារង្វាន់រដ្ឋដល់រាល់បណ្តាគូស្វាមីភរិយា អាល្លឺម៉ង់ថ្មី៕ដោយ អៀង សុខម៉ិញ (RFI)
