សកម្មជនគាំទ្របក្សប្រឆាំងម្នាក់ ខ្យល់គរស្លាប់ពេលចូលរួមវេទិកា
Cambodia News
ស្វាយរៀង៖ កាលពីព្រឹកថ្ងៃទី១៨ មិថុនា នេះ បុរសវ័យ ៧៣ឆ្នាំ ម្នាក់ដែលជាសកម្មជនគាំទ្រគណបក្សសង្រ្គោះជាតិ បានខ្យល់គរស្លាប់ភ្លាមៗ ខណៈកំពុងអង្គុយរង់ចាំគណៈប្រតិភូរបស់ខ្លួនក្នុងរោងវេទិកាមួយ ដែលត្រូវបានប្រារពធ្វើឡើងនៅភូមិរកាខ្សុក ឃុំមេបុណ្យ ស្រុកស្វាយអន្ទរ ខេត្តស្វាយរៀង។
តាមប្រភពព័ត៌មាន ពីមន្ត្រី នគរបាលស្រុកស្វាយអន្ទរ បានឲ្យដឹងថា បុរសចំណាស់ ដែលបានខ្សល់គរស្លាប់នោះ ឈ្មោះ ភួន ចឹម ជាប្រជាកសិកររស់នៅភូមិថ្កូវ ឃុំមេបុណ្យ។
លោកបានបន្តថាមុនដំបូងគាត់អង្គុយលើកៅអីឈើ ក្រោមរោងវេទិកា ជាមួយសកម្មជនគាំទ្រប្រមាណជាង២០នាក់ផ្សេងទៀត ដើម្បីរង់ចាំការមកដល់របស់គណៈប្រតិភូនៃគណបក្សសង្គ្រោះជាតិ។ មួយសន្ទុះក្រោយមកគឺនៅវេលាម៉ោងប្រមាណជា៨និង១០នាទីព្រឹក គេឃើញគាត់ដួលធ្លាក់ពីកៅអីដោយខ្លួនឯងហើយសន្លប់បាត់ស្មារតីតែ ម្ដង។
បន្ទាប់ក៏បានយករថយន្តដឹកគាត់ទៅកាន់មន្ទីរពេទ្យបង្អែកស្រុក ប៉ុន្តែពេលទៅដល់គ្រូពេទ្យបានពិនិត្យហើយថាគាត់បានស្លាប់បាត់ ទៅហើយ៕
