អតីតភ្នាក់ងារ CIA ចោទសហរដ្ឋអាម៉េរិកថាលួចចូលប្រព័ន្ធកុំព្យូទ័រហុងកុង និងចិន
លោក Edward Snowden ដែលជាអតីតភ្នាក់ងារស៊ើបការសម្ងាត់របស់ CIA បានចោទរដ្ឋាភិបាលសហរដ្ឋអាម៉េរិកថា បានលួចវាយលុកចូលប្រព័ន្ធកុំព្យូទ័រក្នុងប្រទេសហុងកុង និងចិន អស់រយៈពេលជាច្រើនឆ្នាំមកហើយ។
លោក Snowden ដែលបានលួចផ្ដល់ព័ត៌មានឲ្យអ្នកកាសែតអំពីកម្មវិធីស៊ើបការលួច ឃ្លាំមើលរបស់សហរដ្ឋអាម៉េរិក បានលើកឡើងអំពីបញ្ហានេះ នៅក្នុងកាសែតមួយក្នុងប្រទេសហុងកុង។
ការ ធ្វើនេះ គឺចេញឡើងនៅពេលដែលប្រទេសចិនមិនព្រមធ្វើការបញ្ជាក់ថាតើ ខ្លួនបានទទួលសំណើសុំធ្វើបត្យាប័នរូបលោកពីរដ្ឋាភិបាលអាម៉េរិក ឬយ៉ាងណា? ដើម្បីបញ្ជូនរូបលោកដែលកំពុងលាក់ខ្លួននៅហុងកុងទៅឲ្យអាម៉េរិកនោះ ។
និពន្ធនាយកកាសែតចិន (the South China Morning Post) លោក Chow Chung-yan បាននិយាយថា លោក Snowden ចង់ឲ្យសាធារណជនបានដឹង និងជួយគាត់។ ចាងហ្វាងកាសែតនេះបានបន្តទៀតថា លោក Snowden បានដឹងយ៉ាងច្បាស់អំពីសកម្មភាព និងលទ្ធផលរបស់ខ្លួន។ គាត់ជឿជាក់ថា អ្វីដែលគាត់កំពុងតែធ្វើ គឺជាការត្រឹមត្រូវ ហើយគាត់បានគិតយ៉ាងល្អិតល្អន់ អំពីបញ្ហានេះ។ នេះពុំមែនជាអ្វីដែលគាត់ធ្វើដោយគ្មានការពិចារណានោះឡើយ៕ (Radio Australia)