បក្សប្រឆាំងរិះគន់នយោបាយនាយករដ្ឋមន្ត្រី
សមាជិកគណបក្សពលករខ្លះបានស្រងាកចិត្តខណៈដែលលោកស្រីនាយករដ្ឋមន្ត្រីបានដាក់បញ្ហាយេនឌ័រជាការពិភាក្សាផ្នែកនយោបាយ។
កាល ពីម្សិលមិញនេះ លោកស្រីនាយករដ្ឋមន្រ្តី Julia Gillard បានបង្កើតក្រុមគាំទ្រស្រ្តីមួយដែលមានឈ្មោះថា ”Women for Gillard”។ លោកស្រីបានព្រមានថាសំឡេងស្រ្តីនឹងត្រូវបានគេបំបាត់ចោលពីឆាក នយោបាយប្រសិនបើគណបក្សប្រឆាំងកាន់កាប់អំណាច ហើយបញ្ហារំលូតកូននឹងក្លាយជា “នយោបាយលេងសើចរបស់បុរស”។ អនុប្រធានគណបក្សប្រឆាំងលោក Julie Bishop ថ្កោលទោសលើការលើកឡើងនេះដោយចាត់ទុកថាជានយោបាយបំបែកបំបាក់។ សូម្បីតែអ្នកគាំទ្រលោកស្រី Julia Gillard ក៏មានចម្ងល់លើបញ្ហានេះដែរ។ សមាជិកសភាគណបក្សពលរកលោក Stephen Jones មានប្រសាសន៍ថាលោកមិនស្របក្នុងការលើកយកបញ្ហារំលូតកូនជា បញ្ហាសម្រាប់ធ្វើការឃោសនាបោះឆ្នោតនោះទេ ដោយយើងគួរផ្តោតទៅលើបញ្ហាគោលនយោបាយធំៗ។
សមាជិកសភាមួយរូប ទៀតបានប្រាប់ ABC ថាការលើកឡើងរបស់នាយករដ្ឋមន្ត្រីទាក់ទងទៅនឹងបញ្ហាស្រ្តីមានភាព មិនស៊ីសង្វាក់គ្នា ដោយលោកស្រីបានសម្រេចចិត្តគាំទ្រព្រឹទ្ធសមាជិក David Feeney សំរាប់ការរក្សាកៅអីសភាតំណាងរាស្រ្តរបស់មណ្ឌល Batman វិញ៕ (Radio Australia)
