រថយន្តមួយគ្រឿងបើកថយក្រោយបំបុកផ្ទះស្ត្រីម្នាក់ សង្ស័យស្នេហ៍ត្រីកោណ
Cambodia News
ហេង នាង
ភ្នំពេញ ៖ កាលពីវេលាម៉ោង១០ និង៣០នាទីយប់ ថ្ងៃទី៤ មិថុនា រថយន្ត១គ្រឿងម៉ាកកាមរីស៊េរីឆ្នាំ៩១បានបើកថយក្រោយបំបុកផ្ទះ ស្ត្រីម្នាក់នៅបុរីព្រីនថោន ស្ថិតក្នុងភូមិក្បាលដំរី សង្កាត់កាកាប ខណ្ឌពោធិ៍សែនជ័យបណ្តាលឱ្យរងការខូចខាតទ្វារខាងមុខទាំងស្រុង រួចបើកគេចបាត់ ។
តាមប្រភពព័ត៌មានបានឱ្យដឹងថា មុនពេលកើតហេតុ ខណៈពេលស្ត្រីម្ចាស់ផ្ទះកំពុងស្ថិតនៅក្នុងផ្ទះស្រាប់តែមានរថ យន្តម៉ាកកាមរីស៊េរី៩១ពណស១គ្រឿងបើកទៅឈប់នៅខាងមុខផ្ទះបាន បន្តិច ក៏បើកបត់តម្រង់គូទចំទ្វារផ្ទះខាងលើរួចបើកថយក្រោយក្នុងល្បឿន យ៉ាងលឿនបំបុកទ្វារផ្ទះនោះបាក់ខូចខ្ទេចខ្ទី ហើយបើកចេញទៅបាត់ស្រមោល។
ក្រោយកើតហេតុគេឃើញម្ចាស់ផ្ទះចាកចេញទៅបាត់ ដែរ ទំនងជាមានការភ័យខ្លាច ព្រោះនេះមិនមែនជាហេតុការណ៍គ្រោះថ្នាក់ចរាចរណ៍ទេ វាអាចជាចេតនាបើកបំបុកដើម្បីជាការព្រមានម្ចាស់ផ្ទះ ដែលគេសង្ស័យថា មានពាក់ព័ន្ធរឿងស្នេហាត្រីកោណ៕
