ចិនទទួលរងការរិះគន់ពីវិធានការរបស់ខ្លួនក្នុងការដោះស្រាយជម្លោះដែនសមុទ្រ
នៅក្នុងសន្និសីទតំបន់ស្តីពី សន្តិសុខមួយ នៅប្រទេសសិង្ហបុរី ប្រទេសចិនបានទទួលរងនូវការរិះគន់យ៉ាងធ្ងន់ធ្ងរលើវិធានការណ៍ របស់ប្រទេសនេះ ក្នុងការដោះស្រាយជម្លោះដែនដីនៅសមុទ្រចិនខាងត្បូង និងខាងកើត។
រដ្ឋមន្ត្រីក្រសួង ការពារជាតិហ្វ៊ីលីពីនលោក Voltaire Gazmin បានធ្វើការសាកសួរពីគោលបំណងរបស់ប្រទេសចិននៅក្នុងតំបន់ ដោយលើកឡើងថា ការមិនជឿទុកចិត្តគ្នាមានការកើនឡើងទាក់ទងទៅនឹងការធានារបស់ ប្រទេសចិនដែលលើកឡើងថា ខ្លួនគ្មានមហិច្ឆិតាផ្នែកនយោបាយលើតំបន់ជម្លោះនោះទេ។
អគ្គមេបញ្ជាការជាន់ខ្ពស់របស់ប្រទេសចិនមួយរូបបានថ្លែងការពារសកម្ម ភាពរបស់ទីក្រុងប៉េកាំង ដោយលើកឡើងថា នាវាចម្បាំងគួរតែបន្តធ្វើការយាមល្បាតដែនទឹកនៅសមុទ្រចិនខាង ត្បូង និងខាងកើត ប៉ុន្តែប្រទេសចិនមិនដែលចាត់ទុកការពង្រីកទឹកដី ឬការច្បាំងយកទឹកដីជាគោលនយោ បាយរបស់រដ្ឋនោះទេ។
លោក រដ្ឋមន្ត្រីក្រសួងការពារជាតិហ្វ៊ីលីពីនបានថ្លែងថា លោកសង្ឃឹមថាអ្វីដែលឧត្តមសេនីយ៍រូបនេះបានអះអាងនឹងត្រូវគេយក ទៅអនុវត្ត ហើយលោកក៏បានការពារការសម្រេចចិត្តជាឯកតោភាគីរបស់ទីក្រុង ម៉ានីល ក្នុងការដោះស្រាយជម្លោះជាមួយទីក្រុងប៉េកាំង ជាមួយអាជ្ញាកណ្តាលអន្តរជាតិផងដែរ៕ (Radio Australia)