អ្នកវាយលុកតាមអ៊ីនធើរណិតលួចយកឯកសាររបស់អង្គការស៊ើបការសម្ងាត់អូស្រ្ដាលី
រដ្ឋមន្រ្ដីការបរទេសអូស្រ្ដាលី មាន ប្រសាសន៍ថា ការឲ្យដឹងអំពីជនជាតិចិនជាអ្នកវាយលុកតាមប្រព័ន្ធអ៊ីនធើរណិត ហើយលួចបានឯកសារសម្ងាត់ដែលជាប្លង់នៃប្រព័ន្ធអ៊ិនធើរណិត និងសន្តិសុខទីស្នាក់ការធំរបស់ភ្នាក់ងារស៊ើបការសម្ងាត់អូស្រ្ដាលី ហៅកាត់ថា ASIO នៅក្រុងខេនបេរ៉ា នឹងមិនប៉ះពាល់ដល់ទំនាក់ទំនងភាពជាដៃគូយុទ្ធសាស្រ្ដរវាង អូស្រ្ដាលី និងចិននោះទេ។
កម្មវិធី ស៊ើបអង្កេត Four Corners របស់ទីភ្នាក់ងារព័ត៌មានសោតទស្សន៍ ABC អូស្រ្ដាលីបានបង្ហាញឲ្យដឹងថា ប្លង់នោះត្រូវគេលួចនៅក្នុងប្រតិបត្ដិការមួយដែលវាយប្រហារទៅលើ ក្រុមហ៊ុនមួយដែលបានការងារកុងត្រាពីរដ្ឋាភិបាលទាក់ទងនឹងការសាង សង់ទីស្នាក់ការកណ្ដាលរបស់ភ្នាក់ងារស៊ើបការសម្ងាត់អូស្រ្ដាលី។
ឯកសារប្លង់ទាំងនោះមានព័ត៌មានអំពីប្លង់អគារ, ទីតាំងនៃកន្លែងដាក់ប្រព័ន្ធកុំព្យូទ័រមេ និងប្រព័ន្ធទូរគមនាគមន៍។
មាន ប្រសាសន៍ប្រាប់ទៅកម្មវិធីទូរទស្សន៍ Sky ក្នុងស្រុក លោកព្រឹទ្ធសមាជិក Bob Carr សុំមិនធ្វើការអត្ថាធិប្បាយជាលម្អិតលើការចោទប្រកាន់ទាំងនោះ ប៉ុន្ដែមានប្រសាសន៍ថា ទំនាក់ទំនងរវាងអូស្រ្ដាលី និងចិននៅតែរឹងមាំដដែល៕ (Radio Australia)
