ចងក្រងស្ថិតិតាមស្តង់ដារជាលើកដំបូងពីអំពើហិង្សាយេនឌ័រនៅកម្ពុជា
ហេង នាង
Cambodia News
ភ្នំពេញ៖ នៅក្នុងសង្គមកម្ពុជានាពេលបច្ចុប្បន្ន អំពើហិង្សាយេនឌ័រដែលក្នុងនោះមានហិង្សាលើផ្លូវចិត្ត ផ្លូវកាយ ផ្លូវភេទ និងផ្លូវសេដ្ឋកិច្ទ នៅតែជាបញ្ហាចោទដែលធ្វើឲ្យមានការបន្ទុចបង្អាក់ការអភិវឌ្ឍនិងរំខានដល់សុភមង្គលនៅក្នុងគ្រួសារ ក៏ដូចជាសង្គមជាតិទាំងមូល។
បើទោះជានៅក្នុងច្បាប់របស់ប្រទេសកម្ពុជា អំពើហិង្សាយេនឌ័ ដែលពេលខ្លះកើតឡើងនៅក្នុងគ្រួសារ និងពេលខ្លះនៅក្នុងស្ថាប័ន ព្រមទាំងនៅក្នុងសង្គមផងនោះត្រូវបានចាត់ទុកថាជាអំពើខុសច្បាប់ក៏ដោយ ក៏បញ្ហានេះតែងតែកើតមានជាញឹកញាប់ ហើយមានលក្ខណៈខុសៗគ្នាទៅតាមទីកន្លែង និងស្ថានភាពរបស់គ្រូសារនីមួយៗ ដូចជាការប្រមាថ ការមាក់ងាយ ការរំលោភបំពានលើរាង្គកាយ ការបង្កឲ្យមានរបួសស្នាម ដោយមានករណីខ្លះបានបង្កឲ្យបាត់បង់ជីវិតក៏មាន។
ទោះបីជាយ៉ងនេះក្តី ក៏ប្រទេសកម្ពុជានៅមិនទាន់មានទិន្នន័យជាក់លាក់ណាមួយយកមកសំអាង ថាតើអំពើហិង្សាយេនឌ័បានកើនឡើង ឬក៏ថយចុះពីមួយឆ្នាំទៅមួយឆ្នាំនោះ។
ដោយមើលឃើញពីសារប្រយោជន៍នៃទិន្នន័យទាក់ទិននឹងអំពើហិង្សាប្រភេទនេះ កម្មវិធីស៊ុយអែតសម្រាប់ការអភិវឌ្ឍ ICT នៅក្នុងតំបន់កំពុងអភិវឌ្ឍន៍ ដែលហៅកាត់ថា ស្ប៉ាយឌ៍រ
(SPIDER: The Swedish Program for ICT in Developing Regions) បានឧបត្ថម្ភគម្រោងមួយដែលមានឈ្មោះថា “ការចូលរួមទប់ស្កាត់អំពើហិង្សាយេនឌ័រនៅកម្ពុជា”។
គម្រោងនេះមានគោលបំណងផ្ដល់ចំណេះដឹងស្តីពីការប្រើប្រាស់បច្ចេកវិទ្យាព័ត៌មាន និងសារគមនាគមន៍ជូនសមាជិកក្រុមប្រឹក្សាឃុំ-សង្កាត់ និងអង្គការស្ត្រីមួយចំនួននៅកម្ពុជា ដើម្បីចូលរួមអនុវត្តផែនការសកម្មភាពជាតិក្នុងការបញ្ឈប់ហិង្សាលើស្ត្រី ដោយធ្វើការប្រមូលផ្ដុំនិងវិភាគទិន្នន័យដែលប្រមូលបានពីការសិក្សាស្រាវជ្រាវតាមរយៈកម្រងសំណួរពាក់ព័ន្ធទៅលើយន្តការសម្រាប់ការទប់ស្កាត់អំពើហិង្សាយេនឌ័រ។
លោកស្រី សុក សុគន្ធា ប្រធានគម្រោងអំពើហិង្សាទាក់ទិននឹងយេនឌ័រនៃអង្គការវិទ្យាស្ថានបើកទូលាយបាននិយាយថា គម្រោងនេះអាចត្រូវបានទទួលស្គាល់ថា ជាការសិក្សាលើកដំបូងលើយន្តការដោះស្រាយ និងទប់ស្កាត់ អំពើហិង្សាយេនឌ័រនៅក្នុងប្រទេស។
លោកស្រីបញ្ជាក់ថា គម្រោងនេះបានធ្វើការនៅក្នុងតំបន់គោលដៅចំនួន ៣៧៩ ឃុំ-សង្កាត់ស្ថិតនៅខេត្តបាត់ដំបង កំពង់ធំ សៀមរាប និងរាជធានីភ្នំពេញ ដោយការសិក្សាបានផ្ដោតផងដែរទៅលើការប្រមូលព័ត៌មានអំពើហិង្សាគ្រប់ប្រភេទក្នុងឆ្នាំ ២០១១ ដើម្បីចងក្រងជាស្ថិតិ មានស្តង់ដារជារួមមួយសម្រាប់បម្រើតម្រូវការជាទូទៅ។ គម្រោងនេះបានចាប់ផ្តើមអនុវត្តចាប់ពីខែមេសាឆ្នាំ ២០១២ និងបញ្ចប់នៅក្នុងខែឧសភា ឆ្នាំ ២០១៣ នេះ។
គួរបញ្ជក់ដែរថា អង្គការ APC (Association for Progressive Communication) ជាអ្នកដឹកនាំគម្រោងនេះ ខណៈដែលអង្គការវិទ្យាស្ថានបើកទូលាយជាអ្នកប្រតិបត្តិ ដោយទទួលខុសត្រូវក្នុងការប្រមូលទិន្នន័យ និងធ្វើការបណ្ដុះបណ្ដាលសមាជិកដែលជាក្រុមគោលដៅ ដោយមានកិច្ចសហការជាមួយសម្ព័ន្ធភាពជាតិឃុំ-សង្កាត់។
លោកស្រី សុក សុគន្ធា បានបញ្ជាក់ថា គម្រោងនេះបានឆ្លុះបញ្ចាំងពីការចូលរួមសកម្មភាព និងជាមធ្យោបាយមួយដែលនាំឆ្ពោះទៅសម្រេចបានគោលដៅអភិវឌ្ឍរបស់ប្រទេសនិងគោលដៅអភិវឌ្ឍសហស្សវត្ស។
លោកស្រីបន្តថា ការយល់ដឹងទូលំទូលាយនៃការកើតមានឡើងនៃអំពើហិង្សាលើស្ត្រី និងវត្តមាននៃយន្តការដោះស្រាយ ឆ្លើយតបរបស់រាជរដ្ឋាភិបាលទៅលើបញ្ហានេះ ជាចំណុចវិជ្ជមានមួយដែលផ្ដល់ឱកាសឲ្យមានការតាមដានជាសាធារណៈទៅលើការទប់ស្កាត់អំពើហិង្សាយេនឌ័រនៅកម្ពុជា៕ (២០ ឧសភា ២០១៣)
