អ.ស.ប អនុម័តសេចក្តីសម្រេចអំពីការបញ្ចប់អាណានិគមបារាំងនៅកោះប៉ូលីណេស៊ី
កាលពីថ្ងៃសុក្រម្សិលមិញ មហាសន្និបាតអ.ស.ប បានអនុម័តសេចក្តីសម្រេច ដាក់កោះប៉ូលីណេស៊ីបារាំង ឲ្យស្ថិតក្នុងបញ្ជីនៃទឹកដី ដែលត្រូវបិទបញ្ចប់អាណានិគម។ សេចក្តីសម្រេចដែលបានធ្វើឲ្យបារាំងផ្ទុះកំហឹង ដោយចោទថា វាជាការជ្រៀតជ្រែកចូលក្នុងកិច្ចការផ្ទៃក្នុងរបស់បារាំង និងជាការបំពានទៅលើជម្រើសតាមលក្ខណៈប្រជាធិបតេយ្យរបស់ប្រជាជន ប៉ូលីណេស៊ី។
សេចក្តីសម្រេច ដែលមហាសន្និបាតអ.ស.ប អនុម័ត កាលពីថ្ងៃសុក្រម្សិលមិញនេះ ត្រូវបានស្នើឡើងដោយរដ្ឋជាសមាជិកមួយចំនួន ដែលជាកូនកោះតូចៗ នៅក្នុងមហាសមុទ្រប៉ាស៊ីហ្វិក ក្បែរប្រជុំកោះប៉ូលីណេស៊ីរបស់បារាំង (Polynésie française)។
ប៉ូលីណេស៊ី ដែលមានកូនកោះតូចៗចំនួន ១១៨ ស្ថិតនៅខាងកើតប្រទេសអូស្រ្តាលី និងនូវែលសេឡង់ ក្នុងមហាសមុទ្រប៉ាស៊ីហ្វិក។ បច្ចុប្បន្ននេះ ប៉ូលីណេស៊ី គឺជាដែនដីរបស់បារាំង នៅឯនាយសមុទ្រ ដែលមានលក្ខណៈជាដែនដីស្វយ័ត ដោយប្រជាជនប៉ូលីណេស៊ី ជាអ្នករៀបចំបោះឆ្នោតជ្រើសរើសសភាតំណាង និងប្រធានាធិបតីរបស់ខ្លួន គ្រាន់តែ អំណាចសំខាន់ៗមួយចំនួន ដូចជា នយោបាយការបរទេស ការពារជាតិ សន្តិសុខ តុលាការ ជាដើម ស្ថិតក្រោមការគ្រប់គ្រង់របស់បារាំង។
បារាំងបានព្យាយាមគ្រប់មធ្យោបាយការទូតរបស់ខ្លួន ដើម្បីរារាំងកុំឲ្យមហាសន្និបាតអ.ស.ប សម្រេចដាក់ប៉ូលីណេស៊ី ទៅក្នុងបញ្ជីដែនដី ដែលត្រូវបញ្ចប់អាណានិគម។ ក៏ប៉ុន្តែ ការខិតខំប្រឹងប្រែងរបស់បារាំងត្រូវទទួលបរាជ័យ ហើយនៅភ្លាមៗ ក្រោយពីសេចក្តីសម្រេចរបស់មហា សន្និបាតអ.ស.ប ត្រូវបានអនុម័ត បារាំងធ្វើការបរិហារសេចក្តីសម្រេចនេះថា ជាការជ្រៀតជ្រែកទៅក្នុងកិច្ចការផ្ទៃក្នុងរបស់បារាំង និងជាការបំពានទៅលើជម្រើសរបស់ប្រជាជនប៉ូលីណេស៊ី ដែលទើបនឹងបានបោះឆ្នោតគាំទ្រគណបក្សនយោបាយ ដែលមាននិន្នាការប្រឆាំងនឹងការប្រកាសឯករាជ្យពីបារាំង។
ប្រទេសមួយចំនួន រួមមាន អាមេរិក អង់គ្លេស អាល្លឺម៉ង់ និងហូឡង់ ជាដើម ក៏បានបង្ហាញនូវជំហរមិនគាំទ្រសេចក្តីសម្រេចរបស់អ.ស.បនេះដែរ ដោយលើកហេតុផលស្រដៀងគ្នានឹងបារាំងដែរ គឺបរាជ័យរបស់ក្រុមទាមទារឯករាជ្យ ក្នុងការបោះឆ្នោតជាតិប៉ូលីណេស៊ីនាពេលថ្មីៗនេះ។
គួរបញ្ជាក់ថា កាលពីថ្ងៃសុក្រម្សិលមិញនេះដែរ នៅក្នុងថ្ងៃជាមួយគ្នា ដែលអ.ស.ប អនុម័តដាក់ប៉ូលីណេស៊ី ក្នុងបញ្ជីដែនដី ដែលត្រូវបញ្ចប់អាណានិគម ប្រធានាធិបតីចប់អាណត្តិរបស់ប៉ូលីណេស៊ី ដែលជាអ្នកមាននិន្នាការទាមទារឯករាជ្យ បានចាញ់ឆ្នោត របូតអំណាចទៅក្នុងដៃអតីតប្រធា នាធិបតីប៉ូលីណេស៊ី ដែលប្រឆាំងនឹងការទាមទារឯករាជ្យ។
ការដែលមហាសន្និបាតអ.ស.ប ចេញសេចក្តីសម្រេចដាក់ប៉ូលីណេស៊ី ទៅក្នុងបញ្ជីដែនដី ដែលត្រូវបញ្ចប់អាណានិគមនេះ គឺមានន័យថា បារាំងត្រូវរៀបចំយន្តការមួយ ដើម្បីធ្វើយ៉ាងណាឈានទៅរៀបចំការបោះឆ្នោតប្រជាមតិ ឲ្យប្រជាជនប៉ូលីណេស៊ីសម្រេចដោយខ្លួនឯងថា តើពួកគេចង់នៅជាដែនដីរបស់បារាំង ឬមួយចង់ក្លាយជារដ្ឋឯករាជ្យពេញលេញ? ក៏ប៉ុន្តែ សេចក្តីសម្រេចរបស់មហាសន្និបាតអ.ស.ប មិនមានអានុភាពផ្លូវច្បាប់ ដូចជាសេចក្តីសម្រេចរបស់ក្រុមប្រឹក្សាសន្តិសុខនោះទេ។ សេចក្តីសម្រេចរបស់មហាសន្និបាត ទាក់ទងនឹងការបញ្ចប់អាណានិគមបែបនេះ កម្រនឹងត្រូវបានប្រទេសមហាអំណាចអាណានិគមគោរពតាមណាស់ រហូតមកទល់នឹងសព្វ ថ្ងៃនេះ៕ដោយ សេង ឌីណា (RFI)
