សាលាឧទ្ធរណ៍ សម្រេចឲ្យកូនប្រុសលោកឧកញ៉ា ឌួង ងៀប ម្នាក់នៅក្រៅឃុំជាបណ្តោះអាសន្ន
Cambodia News
ភ្នំពេញ៖ សំណុំរឿងកូនប្រុសទាំង២ របស់លោកឧកញ៉ា ឌួង ងៀប អនុប្រធាននាយកដ្ឋាននគរបាលអន្តោប្រវេសន៍ក្រសួងមហាផ្ទៃ និងអង្គរក្សម្នាក់ទៀត ដែលបានធ្វើសកម្មភាពយកកាំភ្លើង ទៅវាយលើអ្នកដទៃ បណ្តាលឲ្យរងរបួសនោះ ត្រូវសាលាដំបូងរាជធានីភ្នំពេញ កំណត់យកសំណុំរឿងនេះ ទៅបើកសវនាការនៅថ្ងៃទី២០ ខែឧសភា ឆ្នាំ២០១៣ បន្ទាប់ពីពួកគេជាប់ឃុំ នៅពន្ធនាគារអស់រយៈពេលមួយខែ។
នៅចន្លោះពេលនេះ ពោលគឺនៅថ្ងៃទី១៧ ខែឧសភា ឆ្នាំ២០១៣ សាលាឧទ្ធរណ៍បានសម្រេចឲ្យកូនប្រុសរបស់លោក ឌួង ងៀប ម្នាក់ ឈ្មោះឌួង គឹមឡុង ឲ្យនៅក្រៅឃុំបណ្តោះអាសន្ន ដូច្នេះសំណុំរឿងនេះនៅសល់ជនជាប់ចោទ២នាក់ទៀតនៅជាប់ឃុំ។ ប៉ុន្តែសវនាការជំនុំជម្រះនៅសាលាដំបូងរាជធានីភ្នំពេញ លើកយកមកជំនុំជម្រះលើជនជាប់ចោទទាំង៣នាក់តែម្តង ព្រោះការសម្រេចនៅក្រៅឃុំជាសំណុំរឿងមុនអង្គសេចក្តី។
គួររំលឹកថា កាលពីរំលងអធា្រត្រឈានចូលថ្ងៃទី១៤ ខែមេសា ឆ្នាំ២០១៣ នៅក្នុងហាងមួយយីហោ ហ្គេឡាង ឡារ៉ង់ ដែលមានទីតាំងបណ្តោយផ្លូវលេខ៦៣ សង្កាត់បឹងកេងកងទី១ ខណ្ឌចំការមន ឈ្មោះ មុំ ឌីណា ភេទប្រុស អាយុ២៧ឆ្នាំ មានទីលំនៅផ្ទះលេខ៦៧ ផ្លូវលេខ៤៧៤ សង្កាត់បឹងត្របែក ខណ្ឌចំការមន រួមជាមួយមិត្តភក្តិមួយចំនួនទៀតបានចូលផឹកស៊ីដើម្បីចូលរួមអបរសាទរ បុណ្យចូលឆ្នាំថ្មី។
ពេលផឹកស៊ីបានបន្តដល់ម៉ោង២ និង១២នាទីរំលងអធា្រត្រ ឈានចូលថ្ងៃទី១៤ ខែមេសា ឆ្នាំ២០១៣ ក្រុមជនរងគ្រោះបានស្រែកអបអរសាទរឡើងកងរំពង ដែលជាហេតុធ្វើឲ្យឈ្មោះ ឌួង ឆាយ និងឈ្មោះ ឌួង គឹមឡុង ព្រមទាំងអង្គរក្ស ៣នាក់ផ្សេងទៀត មានការខឹងសម្បារយ៉ាងខ្លាំង ពេលនោះឈ្មោះ ឌួង ឆាយ បានដកកាំភ្លើងខ្លីម៉ាករ៉ូឡូ ចេញពីចង្កេះ រួចដើរទៅវាយក្បាលជនរងគ្រោះបណ្តាលឲ្យបែកហូរឈាមជោកខ្លួន។ បន្ទាប់មកពួកក្រុមកូនឧកញ៉ា ឌួង ងៀប បាននាំគ្នាឡើងជិះរថយន្តចេញបាត់អស់៕
