ម៉ូតូបីគ្រឿងបើកបុកគ្នា បណ្តាលឲ្យរងរបួសធ្ងន់ស្រាល ៦នាក់
Cambodia News
ភ្នំពេញ ៖ កាលពីវេលាម៉ោង ២១ នឹង ១០ នាទីយប់ថ្ងៃទី ១៤ ខែឧសភា មានហេតុការណ៍គ្រោះថ្នាក់ចរាចរណ៍ បង្កឡើងម៉ូតូ៣គ្រឿង បើកបុកគ្នានៅតាមបណ្តោយផ្លូវព្រះស៊ីសុវត្ថិ មុខព្រះបរមរាជវាំង ស្ថិតក្នុងសង្កាត់ចតុមុខ ខណ្ឌដូនពេញ បណ្តាលឲ្យមនុស្ស៦នាក់រងរបួសធ្ងន់ស្រាល។
ប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុគេបានឃើញយុវជនពីរនាក់ជិះម៉ូតូមួយគ្រឿងម៉ាកវ៉េវ ពណ៌ក្រហម ពាក់ស្លាកលេខ ភ្នំពេញ 1T 3866 និងមួយគ្រឿងទៀតម៉ាកសេ១២៥ ពណ៌ខ្មៅ ពាក់ស្លាកលេខ ភ្នំពេញ 1S 6663 ធ្វើដំណើរស្របគ្នា តាមបណ្តោយផ្លូវព្រះស៊ីសុវត្ថិ ក្នុងទិសដៅពីត្បូងទៅជើង ខណៈមកដល់ចំណុចកើតហេតុខាងលើនេះ ស្រាប់ជ្រុលទៅបុកនឹងបុរសម្នាក់កំពុងជិះម៉ូតូវីវ៉ា ពណ៌ខ្មៅ ពាក់ស្លាកលេខភ្នំពេញ 1AN 0205 ដឹកប្រពន្ធ បណ្តាលឲ្យម្ចាស់ម៉ូតូទាំងបីគ្រឿងត្រូវរងរបួសធ្ងន់ស្រាល បញ្ជូនទៅសង្គ្រោះនៅមន្ទីរពេទ្យភ្លាមៗ ។
ក្រោយពេលកើតហេតុ សមត្ថកិច្ចជំនាញ បានចុះទៅអន្តរាគមន៍ធ្វើការវាស់វែង ដល់កន្លែងកើតហេតុ នឹងបានអូសយកម៉ូតូទាំងបីគ្រឿងទៅរក្សាទុកនៅអធិការដ្ឋាននគរបាល ខណ្ឌដូនពេញ ដើម្បីរងចាំដោះស្រាយតាមផ្លូវច្បាប់ ៕ ហេង នាង
