ពៅ បញ្ញាពេជ្រ បង្ហាញវីដេអូឃ្លីប
Cambodia News
ព័ត៌មានកម្សាន្ត
ភ្នំពេញ ៖ អតីតតារាចម្រៀងសំនៀងរ៉ៃកណ្តឹងនាង ពៅ បញ្ញាពេជ្រ បានបង្ហាញនូវវីដេអូឃ្លីបជាលើកដំបូងនៅក្នុងហ្វេសប៊ុករបស់នាងរៀបរាប់ពីអាការះជំងឺដល់ប្រិយមិត្តគាំទ្រ ចាប់តាំងពីនាងបានវិលត្រឡប់មកព្យាបាលជំងឺនៅក្នុងប្រទេសកម្ពុជាវិញអស់រយះពេលជាច្រើនខែមកនេះ។
វីដេអូឃ្លីបដែលមានរយះពេលជិត៣នាទីដែលពៅ បញ្ញាពេជ្រ បានបង្ហោះនៅលើហ្វេសប៊ុករបស់នាងគឺចំពេលដែលនាងបានប្រារព្ធខួបកំណើតនៅថ្ងៃទី៤ ខែឧសភា ឆ្នាំ២០១៣ ដែលនៅក្នុងនោះក្រៅអំពីការថ្លែងអំណរគុណសម្រាប់អ្នកគាំទ្រទាំងអស់ដែលបានផ្ញើសារអបអរសាទរ និងជូនពរចំពោះរូបនាងនោះ ពៅ បញ្ញា ពេជ្រ ក៍បានឆ្លើយតបចំពោះប្រិយមិត្តមួយចំនួនដែលចង់ដឹងពីអាការះជំងឺរបស់នាង និងចង់ដឹងពេលណានាងអាចច្រៀងបានវិញផងដែរ។
នាង និយាយថា រហូតមកដល់នាពេលនេះសុខភាពរបស់នាងនៅតែមានលក្ខណះមិនទៀងទាត់ឡើយ ពោលគឺអាស្រ័យទៅលើពេលវេលា អាកាសធាតុ និងផ្លូវចិត្ត។ នាងបញ្ជាក់ថា “ប្រសិនបើថ្ងៃណានាងខ្ញុំមានអារម្មណ៍ល្អ មានកម្លាំងកំហែងជំងឺមិនធ្វើទុក្ខ នាងខ្ញុំអាចច្រៀងបានដូចពីមុន ប៉ុន្តែប្រសិនបើថ្ងៃណានាងខ្ញុំមិនស្រួលខ្លួនអស់កម្លាំង ចុកដៃ ចុងឆ្អឹងធ្វើឲ្យនាងខ្ញុំមិនអាចច្រៀងបានទេ កុំថាឡើយច្រៀង សម្បីតែនិយាយក៍ហត់ដែរ។ “ចំពោះបងប្អូនមួយចំនួនដែលតែងតែសួរនាងខ្ញុំថា ពេលណានាងខ្ញុំអាចជាដើរបាន?បញ្ហានេះនាងខ្ញុំពិបាកនឹងធ្វើការឆ្លើយតបណាស់ ពីព្រោះវាបានប៉ះពាល់យ៉ាងធ្ងន់ធ្ងរដល់ខួរឆ្អឹងខ្នង ដូច្នេះយើងមិនអាចនិយាយបានថា យើងអាចដើរបានឬមិនបាននោះទេព្រោះវាជាការពិបាកក្នុងការចំណាយពេលយូរក្នុងការព្យាបាល ដូច្នេះគួបផ្សំនឹងការព្យាយាមតស៊ូ ប្រឹងប្រែងដោយខ្លួនយើងផ្ទាល់ក៍ដូចជាការលើកទឹកចិត្ត និងការផ្តល់កម្លាំងចិត្តពីសំណាក់បងប្អូនទាំងអស់គ្នា សង្ឃឹមថានឹងមានអច្ឆរិយកើតឡើងនៅក្នុងថ្ងៃណាមួយ។
ជាចុងក្រោយនៃការអធិប្បាយក្នុងវីដេអូឃ្លិបនោះ ពៅ បញ្ញាពេជ្រ បានថ្លែងអំណរគុណដល់បងប្អូនទាំងអស់ដែលបានផ្ដល់ការអាណិត ស្រឡាញ់ចំពោះនាង រួមទាំងការបួងសួងនានាឲ្យនាងឆាប់ជា។ ពិសេសនោះ គឺនាងអរគុណដល់កញ្ញាម្នាក់ដែលបានផ្ដល់នំខួបកំណើតដល់នាងផងដែរ។
បើទោះបីជានៅក្នុងវីដេអូឃ្លិបនោះគេសង្កេតឃើញថា ពៅ បញ្ញាពេជ្រ នៅមានភាពស្រស់បោះ និងរីករាយក៍ដោយ ប៉ុន្តែទាំងនេះគឺគ្រាន់តែជាអាការះខាងក្រៅប៉ុណ្ណោះ ពោលគឺជំងឺរបស់នាងនៅតែមានអាការះធ្វើទុកម្តងម្កាលនៅឡើយ នៅក្នុងពេលដែលនាងកំពុងតែបន្តអង្គុយនៅលើរទះរុញដដែលនោះ។
ពៅ បញ្ញាពេជ្រ ធ្លាប់បានសាងកេរឈ្មោះនៅក្នុងវិស័យសិល្បះតាមរយះការច្រៀងនៅក្នុងផលិតកម្មហង្សមាស មុនពេលដែលនាងបានទទួលរងការបាញ់ប្រហារឥតត្រាប្រណីពីសំណាក់ឃាតករលាក់មុខកាលពីអំឡុងឆ្នាំ២០០៧នៅក្នុងរាជធានីភ្នំពេញ។
ក្រោយពីកើតហេតុនោះពៅ បញ្ញា ពេជ្រ ត្រូវបានក្រុមគ្រួសារបញ្ជូនទៅព្យាបាលនៅក្នុងប្រទេសវៀតណាម តែឃាតករដ៏អប្រិយនៅតែបន្តលបលួចផ្តាច់ជីវិតនាងដោយគ្មានត្រាប្រណីនៅទីនោះដដែល។
ប៉ុន្តែដោយសារជីវិតថ្លៃ ពៅ បញ្ញាពេជ្រ នៅតែគេចផុតពីគ្រោះអាក្រក់មួយនេះ ហើយក្រុមគ្រួសាររបស់បានយកនាងទៅព្យាបាលនៅក្នុងប្រទេសថៃបន្តទៀត មុនពេលដែលនាងបានវិលត្រឡប់មកព្យាបាលនៅក្នុងប្រទេសកំណើតវិញកាលពីចុងឆ្នាំ២០១២។
ការវិលត្រឡប់មកព្យាលបាលនៅស្រុកកំណើតវិញដោយការប្រថុនប្រថាននេះ ត្រូវបានពៅ បញ្ញាពេជ្រ ធ្លាប់បានអះអាងថា ដោយសារតែក្រុមគ្រួសាររបស់នាងអស់លទ្ធិភាពរាប់រងថ្លៃព្យាបាលនៅប្រទេសថៃបន្តទៀត ទើបសម្រេចមកស្រុកខ្មែរវិញ ខណះពេលដែលនាងលែងមានការបារម្ភពីសុវត្ថិភាពផ្ទាល់ខ្លួនហើយនោះ។ ពៅ បញ្ញាពេជ្រ បញ្ញាក់ថា ការមិនបារម្ភចំពោះសុវត្ថិភាពនេះដោយសារតែនាងយល់ថា ការវិលត្រឡប់ជាន់ដីស្រុកខ្មែរជាថ្មីនាពេលនេះគឺក្នុងនាមនាងជាជនពិកាម្នាក់ដែលមិនអាចធ្វើអ្វីបានប៉ុណ្ណោះ នឹងសុំក្លាយជាជនសមញ្ញម្នាក់ដែលអាចបន្តការព្យាបាលជំងឺដ៏រាំរៃមួយនេះ៕ ស.រ
