ពាក្យសន្យាដែលប្រធានាធិបតីបារាំងមិនបានគោរព
នៅប្រទេសបារាំង ថ្ងៃចន្ទទី៦ ឧសភានេះ គឺជាថ្ងៃខួបមួយឆ្នាំនៃការឡើងកាន់តំណែងជាប្រធានា ធិបតីរបស់លោក François Hollande។ លោក François Hollande ធ្លាប់បានសន្យាថា នៅឆ្នាំ២០០១៣នេះ រដ្ឋាភិបាលនឹងធ្វើអោយឧនភាពថវិកាធ្លាក់ចុះក្រោមកម្រិត៣ភាគរយ។ ឥលូវនេះ ឆ្នាំ២០១៣ហើយ វិបត្តិសេដ្ឋកិច្ចក្នុងប្រទេសនៅតែបន្តមាន។ រោងចក្រជាច្រើនបានបិទទ្វារ ហើយពាក្យសន្យាជាច្រើនទៀតរបស់ប្រធានាធិបតីបារាំងក៏មិនត្រូវបានគោរព ដូចជាការគ្រោងទុកនោះដែរ។
សំរាប់ខួបមួយឆ្នាំនៃការឡើងកាន់តំណែងជាប្រធានាធិបតីបារាំង នៅថ្ងៃចន្ទនេះ លោក François Hollande បានកោះហៅរដ្ឋមន្ត្រីទាំង៣៧នាក់របស់លោក អោយមកជុំគ្នានៅក្នុងសិក្ខា សាលាបូកសរុបការងាររដ្ឋាភិបាល ដើម្បីពិភាក្សាគ្នាលើកំណែទម្រង់ដែលបារាំងត្រូវធ្វើក្នុងពេល បន្តទៅទៀតនោះ។
លោក François Hollande មិនបានជប់លៀងអបអរថ្ងៃខួបនេះទេ ព្រោះថារដ្ឋាភិបាលបារាំងនៅតែប្រឈមមុខនឹងវិបត្តិសេដ្ឋកិច្ចដដែល។ ពាក្យសន្យារបស់ប្រធានាធិបតីបារាំងថាកាត់បន្ថយឧនភាពថវិកាអោយ ធ្លាក់ក្រោមកម្រិត៣ភាគរយនៃផលិតផលសរុបក្នុងស្រុក អោយបានដាច់ខាតនៅឆ្នាំ២០១៣នេះ មិនត្រូវបានគោរពដូចការគ្រោងទុកនោះទេ។ ពិតណាស់ថា លោក ហូឡង់បានគោរពសន្យាដោយបានធ្វើការចរចាឡើងវិញលើកាតិកាសញ្ញា ថវិកាអឺរ៉ុប ដែលចុះហត្ថលេខាដោយអតីតប្រធានាធិបតីបារាំង Nicolas Sarkozy។ ប៉ុន្តែនៅទីបញ្ចប់ លោកមិនបានផ្លាស់ប្តូរទិសដៅនយោបាយអឺរ៉ុបនោះទេ។ បារាំងនឹងបន្តគោលនយោបាយត្បិតត្បៀតថវិកាចាយវាយ ដើម្បីដោះស្រាយបញ្ហាសេដ្ឋកិច្ច ដោយចៀសមិនរួច។
លើសពីនេះ សហភាពអឺរ៉ុបបានរំពឹងទុកថា នៅឆ្នាំ២០១៤ខាងមុខ អត្រាអ្នកគ្មានការងារធ្វើនៅបារាំង នឹងបន្តកើនឡើងថែមទៀត។ សំរាប់ចុងត្រីមាសឆ្នាំ២០១២ កន្លងទៅ អត្រាអ្នកគ្មានការងារធ្វើមានជាង១០ភាគរយនៃប្រជាជនសកម្ម។ ទន្ទឹមនេះដែរ ការសន្យាកន្លងមក ថាអនុញ្ញាតអោយជនបរទេសបានបោះឆ្នោតក៏ត្រូវបានរលាយខ្សុលផងដែរ ដោយសារតែសមាសភាពភាគច្រើននៅរដ្ឋសភាបានជំទាស់។
តែក្នុងមួយឆ្នាំនៃការគ្រប់គ្រងប៉ុណ្ណោះ ប្រជាប្រិយភាពរបស់ប្រធានាធិបតីបារាំងបានធ្លាក់ចុះខ្លាំង។ កាលពីថ្ងៃអាទិត្យម្សិលមិញ នៅទីក្រុងប៉ារីស ប្រជាជនបារាំងរាប់ម៉ឺននាក់បានចុះបាតុកម្ម ទៅតាមសំណូមពររបស់គណបក្សឆ្វេងនិយមជ្រុលមួយ ដែលបានរិះគន់រដ្ឋាភិបាលបារាំងថា មិនគោរពពាក្យសន្យា។ លើសពីនេះ គេក៏សង្កេតឃើញផងដែរនូវបាតុកម្មរបស់ប្រជាជនបារាំងរាប់ពាន់ នាក់ផ្សេងទៀត ដែលមិនពេញចិត្តនឹងសភាដែលទើបអនុម័តច្បាប់អោយអ្នកមានភេទ ដូចគ្នាបានរៀបអាពាហ៍ពិពាហ៍ជាមួយគ្នា។
នៅចំពោះមុខការរិះគន់ទាំងអស់នេះ នាយករដ្ឋមន្ត្រីបារាំង លោក Jean Marc Ayrault បានប្រាប់ថា រដ្ឋាភិបាលបានដាក់កំហិតរួចអស់ហើយ បើទោះជាមានការលំបាកក្តី។ ហើយនៅពេលខាងមុខនេះ ដើម្បីលើកកំពស់សេដ្ឋកិច្ច រដ្ឋបារាំងនឹងបន្ថយវត្តមានរបស់ខ្លួនក្នុងសហគ្រាសសាធារណៈមួយ ចំនួន៕ដោយ ព្រំ សឿន សូលីណា (RFI)