ភ្លៀងលាយខ្យល់កធ្វើឲ្យរលំផ្ទះ ១២ខ្នង នៅស្រុកស្អាង
Cambodia News
ខេត្តកណ្តាល៖ កាលពីរសៀលថ្ងៃទី៥ ឧសភា ស្ថិតនៅក្នុងឃុំ រកាខ្ពស់ និងឃុំស្វាយប្រទាល់ ស្រុកស្អាង ខេត្តកណ្តាល យ៉ាងហោចណាស់ ផ្ទះប្រជាពលរដ្ឋ ១២ខ្នង បានបាក់រលំ និងប៉ើងដំបូល៦ខ្នង ដោយសារភ្លៀងមួយមេយ៉ាងធំលាយឡំនឹងខ្យល់កន្ត្រាក់។
មន្ត្រីនគរបាលស្រុកស្អាងបានឲ្យដឹងថា នៅវេលាម៉ោង១៥និង៣០នាទី ថ្ងៃទី៥ ខែឧសភា ឆ្នាំ២០១៣ មានភ្លៀងធ្លាក់មួយមេយ៉ាងធំលាយឡំនឹងខ្យល់កន្ត្រាក់បក់បោក យ៉ាងខ្លាំងទៅលើឃុំចំនួន២ គឺឃុំរកាខ្ពស់ និងឃុំស្វាយប្រទាល ក្នុងស្រុកស្អាង បានធ្វើឲ្យផ្ទះប្រជាពលរដ្ឋចំនួន១២ខ្នង រងការខូចខាត ដោយខ្លះប៉ើងដំបូល និងខ្លះទៀតដួលរៀបដល់ដី។
មន្ត្រីនគរបាលខាងលើបានបន្តថា គ្រោះធម្មជាតិនេះបានបណ្តាលឲ្យរលំផ្ទះចំនួន៤ខ្នង ដែលមានទំហំ៤ម៉ែត្រ គុណ៥ម៉ែត្រ ធ្វើអំពីឈើប្រក់ស័ង្កសី នៅឃុំរកាខ្ពស់រងការខូចខាតដួលរលំ និង៨ខ្នងទៀតនៅឃុំស្វាយប្រទាលរងការខូចខាត ដួលរលំ២ខ្នង និង៦ខ្នងទៀតប៉ើងដំបូល។
មន្ត្រីនគរបាលបានបន្តទៀតថា ក្រៅពីរលំផ្ទះ និងរបើកដំបូលផ្ទះនេះបានធ្វើឲ្យសម្ភារៈប្រើប្រាស់មួយចំនួនរង ការខូចខាត តែមិនបណ្តាលឲ្យធ្ងន់ធ្ងរអ្វីនោះទេ និងមិនមានមនុស្សណាម្នាក់រងរបួស ឬស្លាប់បាត់បង់ជីវិតឡើយ ៕
