យុវជន ៣នាក់ត្រូវ រថយន្តបើកបុក បណ្តាលឲ្យរងរបួសធ្ងន់
Cambodia News
ភ្នំពេញ៖ កាលពីវេលាម៉ោង២១និង៣០នាទីយប់ ថ្ងៃទី២៣ ខែមេសា រថយន្តមួយគ្រឿងបានបើកបុកពេញ យុវជន៣នាក់ខណៈពេលដែលពួកគេជិះម៉ូតូ បណ្តាលឲ្យរងរបួសធ្ងន់ស្រាល តាមបណ្តោយមហាវិថីព្រះនរោត្តម ចំណុចផ្លូវកែងលេខ១០៨ ក្នុងសង្កាត់វត្តភ្នំ ខណ្ឌដូនពេញ។
តាមប្រភពព័ត៌មានបានឲ្យដឹងថា មុនពេលកើតហេតុ យុវជន៣នាក់បានជិះម៉ូតូមួយគ្រឿងម៉ាកសេ១២៥ ពណ៌ខ្មៅ តាមបណ្តោយមហាវិថីព្រះនរោត្តម ក្នុងទិសដៅពីជើងទៅត្បូង ខណៈមកដល់ចំណុចផ្លូវកែងលេខ១០៨ ក្នុងសង្កាត់វត្តភ្នំ ខណ្ឌដូនពេញ ក៏ត្រូវរថយន្តមួយគ្រឿងម៉ាកកាមរីឆ្លាម ពណ៌ត្រីឆ្លូញ មិនចាំស្លាកលេខ បានបើកបុកពេញទំហឹងតែម្តង បណ្តាលឲ្យរងរបួសធ្ងន់ស្រាល
បន្ទាប់ពីកើតហេតុសមត្ថកិច្ចបានចុះមកអន្តរាគមន៍ភ្លាមៗ ប៉ុន្តែគួរឲ្យសោកស្តាយជនរងគ្រោះមិនចាំស្លាកលេខរថយន្តបង្កហេតុ ដូច្នេះហើយពួកគេក៏សម្រេចចិត្តហៅម៉ូតូកង់បីដឹកម៉ូតូទៅជួសជុល ខ្លួនឯង៕ ហេង នាង
