រដ្ឋាភិបាលចាប់ផ្តើមកាត់បន្ថយបុគ្គលិកជាតិ និងអន្តរជាតិនៅសាលាក្តី
Cambodia News
ភ្នំពេញ៖ រដ្ឋាភិបាលកម្ពុជា សម្រេចកែសម្រួលរចនាសម្ព័ន្ធសាលាក្តីខ្មែរក្រហម ដោយកាត់បន្ថយបុគ្គលិកជាតិ និងអន្តរជាតិមួយចំនួន បន្ទាប់ពីតុលាការកូនកាត់មួយនេះ ជួបវិបត្តិខ្វះខាតថវិកាដំណើរការក្នុងរយៈពេល ២ទៅ ៣ឆ្នាំចុងក្រោយនេះ។
លោក ឯក ថា អ្នកនាំពាក្យប្រតិកម្មរហ័សរបស់រដ្ឋាភិបាល មានប្រសាសន៍ថា ដោយសារក្នុងរយៈពេលប៉ុន្មានឆ្នាំចុងក្រោយនេះ អង្គជំនុំជម្រះវិសាមញ្ញក្នុងតុលាការកម្ពុជា បានកំពុងប្រឈមនឹងបញ្ហាខ្វះថវិកា ដូច្នេះរដ្ឋាភិបាល បានសម្រេច និងកំពុងកែសម្រួលរចនាសម្ព័ន្ធរបស់សាលាក្តីខ្មែរក្រ ហម ដោយកាត់បន្ថយបុគ្គលិកជាតិ និងអន្តរជាតិមួយចំនួន ដើម្បីសម្របសម្រួលទៅនឹងថវិកាមានស្រាប់។
លោក ឯក ថា បន្តថា ក្រៅពីការកាត់បន្ថយបុគ្គលិក រដ្ឋាភិបាល ក៏បានសម្រេចជំរុញឲ្យចៅក្រម និងព្រះរាជអាជ្ញានៃសាលាក្តីនេះ ពន្លឿនសវនាការ ដើម្បីស្វែងរកយុត្តិធម៌ជូនប្រជាជនខ្មែរឲ្យបានឆាប់។
អ្នកនាំពាក្យសាលាក្តីខ្មែរក្រហម លោក នេត្រ ភក្ត្រា ឲ្យដឹងថា ការកាត់បន្ថយបុគ្គលិកនៅក្នុងសាលាក្តីខ្មែរក្រហម ត្រូវបានធ្វើឡើងជារៀងរាល់ឆ្នាំ ស្របតាមនីតិវិធី ដោយសារនេះគឺជាការងារគម្រោងមួយ ក្រោមថវិកាឧបត្ថម្ភ។
តាមសេចក្តីប្រកាសព័ត៌មានរបស់ទីស្តីការគណៈរដ្ឋមន្ត្រី ចេញផ្សាយនៅថ្ងៃទី២០ខែមិនា ឲ្យដឹងថា ការកាត់បន្ថយថវិកាសរុបទាំងអស់ចំនួនជាង ៦.៥ លានដុល្លារអាមេរិក ត្រូវបានធ្វើឡើងនៅក្នុងគម្រោងថវិកាឆ្នាំ២០១៣ សម្រាប់ភាគីជាតិ និងភាគីអន្តរជាតិ៕
