នគរបាលហ្វ៊ីលីពីនចាប់ខ្លួនជនតៃវ៉ាន់មួយក្រុមពីបទឧក្រិដ្ឋកម្មតាមអ៊ីនធើរណិត
នគរបាលប្រទេសហ្វ៊ីលីពីនបានចាប់ខ្លួន ជនជាតិតៃវ៉ាន់មួយក្រុមមានគ្នា ៣០នាក់ ទាក់ទងទៅនឹងការលួចប័ណ្ណឥណទាន និងព័ត៌មានពីធនាគារតាមប្រព័ន្ធអ៊ីនធើណិតនៅខេត្ត Zambales ភាគខាងជើងប្រទេសហ្វ៊ីលីពីន។
ក្រុមជនជាតិតៃវ៉ាន់នេះជាប់ចោទពីបទជំរិតទារប្រាក់ តាមប្រព័ន្ធអ៊ីនធើណិត ដែលពួកគេបានដាក់គោលដៅទៅលើមនុស្សនៅប្រទេសចិន និងកោះតៃវ៉ាន់ ដោយធ្វើការវាយប្រហារទៅលើប្រព័ន្ធផ្ទុកទិន្នន័យ និងជំរិតទារប្រាក់ពីអ្នកទាំងឡាយណាដែលជាប់ពាក់ព័ន្ធរឿងរ៉ាវជា មួយរដ្ឋាភិបាលដែលគេមិនទាន់ដោះស្រាយចប់។
នគរបាលប្រឆាំងបទល្មើសតាមប្រព័ន្ធអ៊ីនធើរណិតហ្វ៊ីលីពីនបានឲ្យដឹង ថា តុលាការ បានធ្វើការចោទប្រកាន់មនុស្ស១៦នាក់ក្នុងចំណោមអ្នកដែល នគរបាលបានចាប់ខ្លួនទាំងអស់ដោយសារតែមានភស្តុតាងគ្រប់គ្រាន់ពី បទលួចលេខគណនីធនាគារ និងលេខប័ណ្ណឥណទាន។
កាលពី ឆ្នាំមុននគរបាលហ្វ៊ីលីពីនបានចាប់ខ្លួនជនជាតិចិន និងតៃវ៉ាន់រាប់រយនាក់ដែលទាក់ទងទៅនឹងបទឧក្រិដ្ឋតាមប្រព័ន្ធ អ៊ីនធើរណិតដោយបានបញ្ជូនពួកគេទៅកាន់ប្រទេសដើមវិញ៕ (Radio Australia)
