ម៉ូតូពីរគ្រឿងបុកគ្នាបណ្តាលឲ្យស្ត្រី២នាក់រងរបួសធ្ងន់
Cambodia News
ភ្នំពេញ៖ កាលពីវេលាម៉ោង២៣និង០០នាទីយប់ ថ្ងៃទី០៣ ខែមេសា មានករណីគ្រោះថ្នាក់ចរាចរណ៍មួយរវាងម៉ូតូពីរគ្រឿង បើកបុកគ្នាពេញទំហឹង ស្ថិតនៅតាមបណ្តោយផ្លូវលេខ២១៣ ស្ថិតក្នុងសង្កាត់ផ្សារថ្មីទី២ ខណ្ឌចំការមន បណ្តាលឲ្យស្ត្រីពីរនាក់រងរបួសធ្ងន់ ត្រូវបញ្ជូនទៅសង្គ្រោះនៅមន្ទីរពេទ្យភ្លាមៗ។
ស្ត្រីពីរនាក់រងរបួសខាងលើនេះនៅមិនទាន់ស្គាល់អត្តសញ្ញាណនៅឡើយទេ។ ចំណែកបុរសដែលជាជនបង្កហេតុបើកជិះម៉ូតូរត់គេចខ្លួនបាត់។
មុនពេលកើតហេតុជនរងគ្រោះទាំងពីរនាក់នេះ បានជិះម៉ូតូគុបជ្រុងមួយគ្រឿង ពណ៌ទឹកប៊ិច ឌុបគ្នាតាមបណ្តោយផ្លូវលេខ ២១៣ លុះបើកមកដល់ចំណុចកើតហេតុខាងលើ ក៏ត្រូវម៉ូតូមួយគ្រឿងទៀតម៉ាកសេ១០០ ស៊េរី២០១០ ពណ៌ខ្មៅ ជិះដោយបុរសម្នាក់ បុកពេញទំហឹងបណ្តាលឲ្យពួកគេទាំងពីរនាក់រងរបួសធ្ងន់។
ក្រោយពេលកើតហេតុជនរងគ្រោះត្រូវសមត្ថកិច្ចហៅរថយន្តសាមុយដឹកយកទៅ មន្ទីរពេទ្យដើម្បីសង្គ្រោះ ចំណែកម៉ូតូសមត្ថកិច្ចដកយកទៅរក្សាទុកនៅអធិការដ្ឋាននគរបាល ខណ្ឌចំការមន៕ ហេង នាង
