តុលាការខេត្តស្វាយរៀងកោះហៅកម្មករដែលត្រូវគេបាញ់ឲ្យចូលទៅបំភ្លឺ
កម្មការិនី ២ នាក់ ក្នុងចំណោម ៣ នាក់ ដែលរងរបួសដោយការបាញ់ប្រហារនៅក្នុងការតវ៉ាមួយ កាលពីខែមុន ត្រូវបានតុលាការខេត្តស្វាយរៀង កោះហៅឲ្យចូលទៅបំភ្លឺនៅថ្ងៃ ២៨ មីនា ខាងមុខនេះខណៈជនសង្ស័យ ក្នុងការបាញ់ប្រហារនៅមិនទាន់ត្រូវបានចោទប្រកាន់នៅឡើយ។
ការកោះហៅជនរងគ្រោះទៅបំភ្លឺនេះធ្វើឡើង បន្ទាប់ពីព្រះរាជអាជ្ញាលោក ហ៊ឹង ប៊ុនជា បានធ្វើការសាកសួរជនសង្ស័យ ឈូក បណ្ឌិត ជាអតីតអភិបាលក្រុងបាវិត កាលពីថ្ងៃ ១៥ មីនា។
លោក ឈូក បណ្ឌិត អតីតអភិបាលក្រុងបាវិត គឺជាជនសង្ស័យតែម្នាក់គត់ ក្នុងការបាញ់ប្រហារទៅលើកម្មករ ៣ នាក់ ឲ្យរងរបួសធ្ងន់ នៅក្នុងការតវ៉ាមួយ នៅក្រុងបាវិត កាលពីថ្ងៃទី ២០ កុម្ភៈ។ លោក ឈូក បណ្ឌិត បានចូលខ្លួនទៅឆ្លើយបំភ្លឺស្ងាត់ៗ មុនពេលកំណត់នៅតុលាការខេត្តស្វាយរៀង កាលពីថ្ងៃទី ១៥ មីនា បន្ទាប់ពីបានបាត់ខ្លួន ចាប់តាំងពីថ្ងៃបាញ់ប្រហារនោះមក។
ជនរងគ្រោះ ប៊ុន ចិន្តា បាននិយាយថា នាងមិនទាន់បានទទួលដីកាកោះនៅឡើយទេ តែនាងស្វាគមន៍នឹងការកោះឲ្យចូលបំភ្លឺនេះ។ នាងបន្តថា ខ្ញុំមិនដឹងថា អ្នកណាបាញ់ខ្ញុំទេ តែទើបដឹងពេលគេបង្ហាញឈ្មោះគាត់សាធារណៈ គឺឈូក បណ្ឌិត ដែលបាញ់ខ្ញុំ។ ខ្ញុំគិតថា គាត់មានបំណងបាញ់កម្មករពិតមែន។
លោក មឿន តុលា ប្រធានផ្នែកការងារ នៃមជ្ឈមណ្ឌលអប់រំច្បាប់ សម្រាប់សហគមន៍ បាននិយាយថា អង្គការលោក បានត្រៀមផ្តល់មេធាវីពីររូប សម្រាប់ការពាររឿងក្តីដល់កម្មករ ប៉ុន្តែលោកមិនទាន់បានទទួលដំណឹងពីដីកាកោះនៅឡើយ៕
