លោក ថេន សេន បារម្ភអំពីរូបភាពប្រទេសមីយ៉ាន់ម៉ាលើឆាកអន្ដរជាតិ
លោក ថេន សេន ប្រធានាធិបតីនៃប្រទេសមីយ៉ាន់ម៉ាបានមានប្រសាសន៍ថា ស្ថានភាពហិង្សានៅតាមភូមិឃុំនៃប្រទេសរបស់លោក បានធ្វើឲ្យខូចឈ្មោះប្រទេសមីយ៉ាន់ម៉ានៅលើឆាកអន្ដរជាតិ។
កាល ពីថ្ងៃអាទិត្យម្សិលមិញនេះ លោក ថេន សេន បានមានប្រសាសន៍តាមវិទ្យុថា ការដុតកម្ទេចវិហារអ៊ិស្លាម និងផ្ទះសម្បែងពលរដ្ឋជាច្រើនខ្នងនៅក្នុងព្រឹត្ដិការណ៍ហិង្សាជា ច្រើនលើកដែលបានចាប់ផ្ដើមពីថ្ងៃទី២០ ខែមីនា គឺប៉ះពាល់យ៉ាងខ្លាំងដល់ភាពថ្លៃថ្នូរនៃប្រទេសមីយ៉ាន់ម៉ា។
ការ ប៉ះទង្គិចគ្នាដ៏សាហាវរវាងក្រុមអ៊ិស្លាមសាសនិក និងពុទ្ធសាសនិកនៅរដ្ឋ Rakhine ប៉ែកខាងលិចប្រទេសដែលបានផ្ទុះឡើងកាលពីឆ្នាំទៅមិញ មកទល់ពេលនេះ ធ្វើឲ្យមនុស្សយ៉ាងតិច១៨០នាក់ស្លាប់បាត់បង់ជីវិត។
លោក ប្រធានាធិបតី ថេន សេន បានព្រមានថា ដំណើរការផ្លាស់ប្ដូរនៃប្រទេសមីយ៉ាន់ម៉ាទៅរកលទ្ធិប្រជាធិបតេយ្យ អាចត្រូវរង្គោះរង្គើដោយសារតែការវាយប្រហារគ្នានេះ។
កាលពី ថ្ងៃសៅរ៍អង្គការសហប្រតិបត្ដិការអ៊ិស្លាមបាននិយាយថា ប្រទេសជាសមាជិកអង្គការនេះនឹងជួបប្រជុំគ្នានៅថ្ងៃទី១៤ ខែមេសា ខាងមុខនៅប្រទេសអារ៉ាប់សាអូឌីតដើម្បីពិភាក្សារកដំណោះស្រាយជុំវិញ បញ្ហាហិង្សាប្រឆាំងនឹងអ៊ិស្លាមសាសនិកនៅក្នុងប្រទេសមីយ៉ាន់ម៉ា៕ (Radio Australia)
