ម៉ូតូពីរគ្រឿងបុកគ្នាបណ្តាលឲ្យមនុស្សបីនាក់រងរបួសធ្ងន់ធ្ងរ
Cambodia News
ភ្នំពេញ ៖ កាលពីវេលាម៉ោង ១៧ និង ០០ នាទីល្ងាចថ្ងៃទី ៣១ ខែមិនា បុរសបីនាក់ ជិះម៉ូតូពីរគ្រឿងបុកគ្នាពេញទំហឹងនៅតាមបណ្តោយផ្លូវលេខ ៣៧១ ភូមិត្នោតជ្រុំ សង្កាត់បឹងទំពុន ខណ្ឌមានជ័យ បណ្តាលឲ្យបុរសបីនាក់ជាម្ចាស់ ត្រូវរងរបួសបែកក្បាលបាក់ជើង ដួលរណូករណែលពេញផ្លូវ។
មុនពេលកើតហេតុគេសង្កេតឃើញបុរសម្នាក់វ័យជាង ២០ ឆ្នាំបានជិះម៉ូតូមួយគ្រឿងម៉ាកវីវ៉ា ពណ៌ខ្មៅ ក្នុងទិសដៅពីលិចមកកើត ខណៈជិះមកដល់ ចំណុចកើតហេតុស្រាប់តែមានក្មេងទំនើងពីរនាក់ស្ថិតក្នុងស្ថានភាព ស្រវឹងស្រាជោគខ្លួនបាន ជិះម៉ូតូសេ ១២៥ ពណ៌ខ្មៅ ស៊េរី ២០១០ឌុបគ្នាក្នុងល្បឿនយ៉ាងលឿន ជ្រុលបុកចំពីមុខម៉ូតូវីវ៉ា ពេញទំហឹងលាន់លឺដូចរន្ទះ ដែលបណ្តាលឲ្យបុរសបីនាក់ជាម្ចាស់ម៉ូតូពីរគ្រឿង ត្រូវដួលបោកក្បាល ខ្លះបាក់ជើង ស្ថិតក្នុងស្ថានភាពធ្ងន់ធ្ងរទាំងអស់ ។
ក្រោយពីកើតហេតុម៉ូតូទាំងពីរគ្រឿងត្រូវសមត្ថកិច្ចអូស យកទៅរក្សាទុកនៅអធិការដ្ឋាននគរបាលខណ្ឌមានជ័យ ដើម្បីរងចាំដោះស្រាយតាមផ្លូវច្បាប់ ។ ចំណែកអ្នករងរបួសត្រូវបញ្ជូនទៅសង្គ្រោះនៅមន្ទីរពេទ្យ៕ ហេង នាង
