ម៉ូតូពីរគ្រឿងបុកគ្នាបណ្តាលឲ្យរងរបួសទាំងសងខាង
Cambodia News
ភ្នំពេញ ៖ កាលពីវេលាម៉ោង ៧និង១៥នាទីព្រឹកថ្ងៃទី២៨ ខែមីនា បុរសនិងស្ដ្រីម្នាក់ រងរបួសធ្ងន់ ដោយសារតែម៉ូតូ របស់ពួកគេទាំងពីរនាក់បុកគ្នា ស្ថិតនៅលើកំណាត់ ផ្លូវជាតិលេខ៣ ក្នុងភូមិ ទួលកី សង្កាត់ភ្លើងឆេះរទេះ ខណ្ឌពោធិ៍សែនជ័យ រាជធានីភ្នំពេញ ។
គ្រោះថ្នាក់ចរាចរនេះ បានផ្ដើមឡើងរវាងម៉ូតូម៉ាកស្មាស់វី ស៊េរី ២០១៣ ពណ៌ខ្មៅលាយក្រហម គ្មានស្លាក លេខ បើកដោយបុរសម្នាក់ មុខរបរអ្នកបើករថយន្ដក្រុមហ៊ុនឯកជន រស់នៅភូមិត្រញំងតាង៉ែ ឃុំអង្គ តាសោម ស្រុកត្រាំកក់ ខេត្ដតាកែវ
មុនពេលកើតហេតុបុរសម្នាក់ឈ្មោះអង ចាន់រិទ្ធ អាយុ២០ឆ្នាំ បើកម៉ូតូក្នុងទិសដៅពីជើងទៅត្បូង លុះដល់ចំណុចកើតហេតុ ក៏បុកម៉ូតូគុបមូល ម៉ាកសេ៥០ ពណ៌ទឹកប៊ិច គ្មានស្លាកលេខ បើកបរដោយស្ដ្រីម្នាក់ឈ្មោះសួង សាវ៉ុន អាយុ៣៣ឆ្នាំ ឌុបកូនតូចម្នាក់ធ្វើដំណើរពីត្បូងទៅជើង ក្នុងបំណែកផ្លូវបញ្ច្រាស រួចបុកគ្នា បណ្ដាលឱ្យពួកគេ ទាំងពីររងរបួសធ្ងន់។
ក្រោយកើតហេតុ ជនរងគ្រោះទាំងពីរនាក់ ត្រូវបានរថយន្ដ សង្គ្រោះនិងក្រុមសង្គ្រោះរបស់អង្គភាព៧១១ នៃកងពលតូចលេខ៧០ ជួយដឹកបញ្ជូនទៅកាន់មន្ទីរពេទ្យព្រះកុសុមៈ ហៅពេទ្យលោកសង្ឃ ៕ ហេង នាង
