ជនសង្ស័យម្នាក់កាច់កម៉ូតូ មិនបានសម្រេច ត្រូវសម្ថកិច្ចចាប់ខ្លួន
Cambodia News
ភ្នំពេញ៖ កាលពីវេលាម៉ោង១១និង៣០នាទី ថ្ងៃទី២៨ ខែមីនា ជនសង្ស័យម្នាក់ ត្រូវកម្លាំងនគរបាល ដេញចាប់ បានភ្លាមៗ បន្ទាប់ពីបក្ខពួករបស់គេម្នាក់ បានធ្វើសកម្មភាព កាច់សោកម៉ូតូ របស់គេមិនបានសម្រេចស្ថិតនៅក្នុង ភូមិព្រៃទា សង្កាត់ចោមចៅ ខណ្ឌពោធិ៍សែនជ័យ។
នគរបាលបាន ឲ្យដឹងថា ជនសង្ស័យ ដែលត្រូវឃាត់ខ្លួននោះ មានឈ្មោះ រុន រ៉ា ភេទប្រុស អាយុ១៨ឆ្នាំ មានមុខរបរ មិនពិតប្រាកដ ស្នាក់នៅផ្ទះជួល ភូមិទួលសង្កែ សង្កាត់ទួលសង្កែ ខណ្ឌឬស្សីកែវ ជិះម៉ូតូមួយគ្រឿង ម៉ាកសេ១២៥ពណ៌សេរីឆ្នាំ២០១៣ពាក់ស្លាកលេខ ភ្នំពេញ 1BT-7920 និងបក្ខពួក របស់គេម្នាក់ទៀតពុំ ត្រូវបានគេស្គាល់អត្តសញ្ញាណនោះទេ រត់គេចខ្លួនបាត់។
ចំណែក ជនរងគ្រោះមាន ឈ្មោះ ហ៊ត តេងលី ភេទប្រុស អាយុ២៨ឆ្នាំ មានមុខ របរជាកម្មកររោងចក្រ ស្នាក់នៅផ្ទះជួល ភូមិព្រៃទា សង្កាត់ចោមចៅ ខណ្ឌពោធិ៍សែនជ័យ មានស្រុកកំណើតនៅ ភូមិអន្លង់តាសេក ឃុំព្រែកអំបិល ស្រុកស្អាង ខេត្តកណ្តាល ជិះម៉ូតូមួយគ្រឿងម៉ាក សេ១២៥ពណ៌ខ្មៅ សេរីឆ្នាំ២០០៨ ពាក់ស្លាកលេខ តាកែវ 1E-1686 ។
មុនពេលកើតហេតុ ជនរងគ្រោះបានប្រាសខ្លួនមួយបន្តិច នៅក្នុងផ្ទះជួល ស្រាប់តែ ឮសំឡេងគេកាច់សោក ម៉ូតូអើតតាមបង្អួចមើល ក៏ឃើញជនសង្ស័យម្នាក់ នៅក្បែរម៉ូតូរបស់ខ្លួន ពេលនោះរួបគេបានស្រែក ធ្វើឲ្យជនសង្ស័យភ័យស្លន់ស្លោរត់ ទៅហក់ឡើងម៉ូតូ របស់គ្នាគេដែល បញ្ឆេះចាំនៅក្បែរនោះ ភ្លាមៗនោះក៏មានការភ្ញាក់ផ្អើល នគរបាលប៉ុស្តិ៍គោលដៅនៅក្បែរនោះបាន ជួយធ្វើអន្តរាគមន៍ដេញតាមបន្តិច ជនសង្ស័យក៏បានផ្តួលម៉ូតូចោលរត់គេចខ្លួនទាំងពីរនាក់ ប៉ុន្តែរត់បានបន្តិច ក៏ត្រូវនគរបាលដេញតាមឃាត់ខ្លួនបានម្នាក់ ប្រគល់ទៅឲ្យប៉ុស្តិ៍នគរបាលចោមចៅ។
ជនសង្ស័យ ត្រូវឃុំខ្លួនជាបណ្តោះអាសន្ននៅប៉ុស្តិ៍នគរបាលចោមចៅដើម្បីស្រាវជ្រាវបន្ត ដើម្បីឲ្យដឹងថាតើជនសង្ស័យរូបនេះជាជនរងគ្រោះ ឬមួយជាបក្ខពួកចោរកាច់សោកម៉ូតូ៕ ហេង នាង
