ធនាគារអភិវឌ្ឍន៍អាស៊ីថា តំបន់ប៉ាស៊ីហ្វិកមានសេដ្ឋកិច្ចលូតលាស់យឺត
ធនាគារអភិវឌ្ឍន៍អាស៊ីបានឲ្យដឹងថា ការលូតលាស់សេដ្ឋកិច្ចនៅតំបន់ប៉ាស៊ី ហ្វិកមានលក្ខណៈយឺតនៅក្នុងឆ្នាំ ២០១២។ គេរំពឹងថា តំបន់នេះនឹងមានកំណើនសេដ្ឋកិច្ចយឺតជាងនេះទៀតនៅក្នុងឆ្នាំ២០១៣ នេះ។
ការត្រួតពិនិត្យមើល ថ្មី ចុងក្រោយស្ដីពីសេដ្ឋកិច្ចនៅតំបន់ប៉ាស៊ីហ្វិករបស់ធនាគារអភិវឌ្ឍន៍ អាស៊ី បានបង្ហាញថា តំបន់នេះមានកំណើនសេដ្ឋកិច្ចចំនួន ៧.៣%នៅឆ្នាំ២០១២ ដែលកំណើននេះតិចជាងកាលពីឆ្នាំ២០១១ ដែលមានកំណើនសេដ្ឋកិច្ចក្នុងកម្រិត ៨.៣%។
នៅឆ្នាំនេះ មានការព្យាករថា តំបន់នេះនឹងមានកំណើតសេដ្ឋកិច្ចក្នុងកម្រិត ៥.២%។
បណ្ឌិត Chris Edmonds អ្នកសេដ្ឋកិច្ចជាន់ខ្ពស់នៃធនាគារអភិវឌ្ឍន៍អាស៊ី មានប្រសាសន៍ថា ការធ្លាក់ចុះនៃសេដ្ឋកិច្ចនេះគឺដោយសារការជិតបញ្ចប់នៃគម្រោង វិនិយោគធំៗ និងគម្រោងសាងសង់ហេដ្ឋារចនាសម្ព័ន្ធសាធារណៈមួយចំនួន។
វិស័យទេសចរណ៍កំពុងជំរុញឲ្យសេដ្ឋកិច្ចងើបឡើងវិញជាមួយនឹងតួលេខដែលគេរំពឹងថា នឹងកើនឡើងទៀតនៅឆ្នាំនេះ។
មានការរំពឹងថា នឹងមានកំណើនសេដ្ឋកិច្ចឡើងបន្តិចវិញនៅឆ្នាំ២០១៤ខាងមុខ៕ (Radio Australia)
