រូបថតភរិយាប្រធានាធិបតីចិនថ្មី ពេញក្នុងទំព័រមុខសារព័ត៌មានចិន
នៅថ្ងៃសៅរ៍នេះ សារព័ត៌មានចិននានា បានដាក់ពេញគេហទំព័រមុខរបស់ខ្លួន នូវរូបថតលោកស្រី Peng Liyuan ដែលជាភរិយារបស់ប្រធានាធិបតីចិនថ្មី។ ក្នុងទស្សនកិច្ចរបស់លោក Xi Jinping នៅរុស្ស៊ី សារព័ត៌មានចិនបានប្តូរទំលាប់ផ្សាយរូបភាព។ ជាជាងយករូបប្រធានាធិបតីចិន និងរុស្ស៊ីដែលចាប់ដៃគ្នាយ៉ាងណែនតាន់តាប់ដាក់ក្នុងទំព័រមុខនោះ សារព័ត៌មានចិនបែរជាយករូបស្ត្រីទីមួយរបស់ប្រទេសខ្លួន មកទាក់ទាញអារម្មណ៍អ្នកអានទៅវិញ។ គួររំលឹកថា លោកស្រី Peng Liyuan មិនមែនត្រឹមតែជាភរិយាលោក លោក Xi Jinping ប៉ុណ្ណោះទេ តែលោកស្រីគឺជាតារាចំរៀងដ៏មានប្រជាប្រិយភាពបំផុត នៅប្រទេសចិន។
ទស្សនកិច្ចរបស់ ប្រធានាធិបតីថ្មីចិន នៅរុស្ស៊ី ការចាប់ដៃគ្នាយ៉ាងណែនតាន់តាប់រវាង លោក Xi Jinping និងលោក Valdimir Poutine ដែលជាមេដឹកនាំប្រទេសមហាអំណាចពីរនៅក្នុងពិភពលោក មិនបានបង្ហាញរូបថតអ្វីគួរអោយកត់សំគាល់ នៅក្នុងទំព័រមុខរបស់សារព័ត៌មានចិនដែលចេញផ្សាយ នៅថ្ងៃសៅរ៍នេះឡើយ។
ផ្ទុយទៅវិញ ដើម្បីទាក់ទាញអារម្មណ៍អ្នកអាន សារព័ត៌មានចិននានាដូចជា Xinjingbao China Daily រឺក៏ Golbal Times ជាដើមនោះ បានប្តូរទំលាប់របស់ខ្លួន ដោយបាននាំគ្នាដាក់រូបថតរបស់លោកស្រី Peng Liyuan ដែលជាភរិយារបស់ប្រធានាធិបតីចិន នៅពេញទំព័រមុខរបស់ខ្លួនទៅវិញ។ កាសែតប្រចាំថ្ងៃរបស់ប្រជាជនចិន ក៏បានដាក់រូបថតភរិយាលោក Xi Jinping នៅក្នុងទំព័រមុខរបស់ខ្លួន ក្បែររូបថតរបស់ស្វាមីលោកស្រី និងប្រធានាធិបតីពូទីនផងដែរ។
ក្នុងដំណើរទស្សនកិច្ចរបស់លោក Xi Jinping នៅរុស្ស៊ី ប្រជាជនយកចិត្តទុកដាក់មើលជាងគេ គឺរូបភាពនៅអាកាសយានដ្ឋានរុស្ស៊ី ក្នុងពេលដែលប្រធានាធិបតីចិននិងភរិយា ចុះពីលើយន្តហោះ។ លោកស្រី Peng Liyuan ចុះពីយន្តហោះដោយបង្ហាញនូវអាកប្បកិរិយាទន់ភ្លន់តាមបែប ធម្មជាតិ។ លោកស្រីក៏បានកៀកដៃស្វាមីលោកស្រី ក្នុងរយៈពេលមួយខ្លីផងដែរ។
សកម្មភាពទាំងអស់នេះ ហាក់ធ្វើអោយលេចឡើងនូវរូបភាពយុវវ័យដ៏ស្រស់ថ្លាមួយ ដែលប្រជាជនចិន បានរង់ចាំអស់រយៈពេលជាង ៣០ឆ្នាំ មកហើយ។
បច្ចេកទេសសារព័ត៌មានចិន ក្នុងការទាក់ទាញអ្នកអាននេះ គឺមិនខុសនោះទេ ព្រោះថាលោកស្រី Peng Liyuan ដែលមានអាយុ៥០ ឆ្នាំ មិនត្រឹមតែមានឋានៈជាភរិយាប្រធានាធិបតីចិនប៉ុណ្ណោះទេ លោកស្រីក៏ជាតារាចំរៀងដ៏មានប្រជាប្រិយ ភាព ខ្ពស់ផងដែរ នៅប្រទេសចិន។
ភាពល្បីល្បាញរបស់លោកស្រីត្រូវបានគេសម្គាល់ឃើញតាមរយៈការបង្ហាញ ខ្លួនជាអចិន្ត្រៃយ៍ អស់រយៈពេល២៥ឆ្នាំ របស់លោកស្រី នៅក្នុងពិធីរាត្រីសមោសរប្រចាំឆ្នាំនៅចិន។ ប្រជាជនចិនរាប់លាននាក់ ចាប់អារម្មណ៍ទៅលើសម្លេងទឹកដមក្នុងការច្រៀងរបស់លោកស្រី។ លើសពីនេះ លោកស្រី Peng Liyuan ក៏ត្រូវបានគេកត់សម្គាល់ផងដែរ ថាជាស្ត្រីមានថ្វីដៃខ្ពស់ផ្នែកដូរ្យដន្ត្រីប្រពៃណីជនជាតិ ភាគតិច នៅចិន៕ ដោយ ព្រំ សឿន សូលីណា (RFI)
