សារ៉ាយ សក្ខិណា និង សូដា នីតា លេចធ្លោក្នុងអាជីពសិល្បះនាឆ្នាំ២០១៣
Cambodia News
ភ្នំពេញ៖ តារាសម្តែងស្រី២ដួង គឺនាង សារ៉ាយ សក្ខិណា និង នាង សូដា នីតា កំពុងតែត្រូវបានគេចាប់អារម្មណ៍យ៉ាងខ្លាំងពីភាពលេចធ្លោរបស់អ្នកទាំងពីរនៅក្នុងអាជីពសិល្បះនាឆ្នាំ២០១៣នេះ បន្ទាប់ពីតារាទាំងពីរដួងនេះបានស្រូបយកតំណែងជាតារាសម្តែង និងជាពិធីការរិនីស្ទើរមិនដាច់សូនោះ។
បើនិយាយពីតារាសម្តែងខ្មៅស្រអែមស្រស់នាង សារ៉ាយ សក្ខិណា គឺគ្មាននរណាម្នាក់មិនដឹងនោះទេថា តារាសម្តែងរូបនេះកំពុងតែឆក់យកប្រជាប្រិយភាពដ៏លើសលប់នៅក្នុងឆ្នាំថ្មីនេះ បន្ទាប់ពីវត្តមានរបស់នាងមានស្ទើរគ្រប់រឿងនៅក្នុងខ្សែភាពយន្តដែលដាក់បញ្ចាំងតាមរោង និងតាមទូរទស្សន៍។ ដោយសារតែទេពកោសល្យសម្តែងដ៏ល្អឥតខ្ចោះរបស់នាង គឺជាមូលហេតុចម្បងដែលបណ្តាលឲ្យម្ចាស់ផលិតនានាមិនអាចមើលរំលងក្នុងការហៅនាងទៅសម្តែងនោះឡើយ បើទោះបីជាតារាស្រីរូបនេះបានបង្ហាញខ្លួនក្នុងរឿងជាបន្តបន្ទាប់ទៅហើយក្តី។
នៅក្នុងពេលបច្ចុប្បន្នតារាសម្តែងដែលមានប្រភពមកពីការប្រលងក្នុងកម្មវិធី Freshie girl ជំនាន់ទី៥ រូបនេះបានបង្ហាញវត្តមាននៅក្នុងរឿង ស្នេហ៍ក្លែងកាយ ដែលចាក់ផ្សាយតាមកញ្ចក់ទូរទស្សន៍My TV និងរឿងកូនក្រមុំស្រុកស្រែ ចាក់ផ្សាយនៅស្ថានីយទូរទស្សន៍បាយ័នព័ត៌មាន ខណះពេលដែលរូបនាងក៍កំពុងតែត្រៀមខ្លួនថតខ្សែភាពយន្តខ្នាតធំ រឿងកុមារី ២៥ ឆ្នាំ វគ្គ២ បន្តទៀតនោះ។
ទន្ទឹមនិងការសម្តែងរឿងមិនដាច់សូរនេះ សារ៉ាយ សក្ខិណា ក៍មានតួនាទីជាពិធីការីនីម្នាក់ប្រចាំស្ថានីយទូរទស្សន៍ហង្សមាសផងដែរក្នុងកម្មវិធីផ្សាយផ្ទាល់ តន្ត្រីលើទឹក និងកម្មវិធី រាត្រីស៊ុនស៊ីម៉ិចកូ និងការបង្ហាញខ្លួនក្នុងឈុតផ្សាយពាណិជកម្មផ្សេងៗផងដែរ។មិនត្រឹមតែប៉ុណ្ណោះ នាងក៍ជាសមាជិកម្នាក់ក្នុងក្រុមបង្ហាញម៉ូត Cambodia Super Model របស់នាង ឌួង ហ្ស៊ូរីដា ផងដែរ។
ទាំងអស់នេះជាភាពលេចធ្លោរបស់តារាសម្តែងខ្មៅស្រអែមរូបនេះដែលបានបណ្តែតខ្លួនក្នុងវិស័យសិល្បះមកជាច្រើនឆ្នាំ ។ ដោយឡែកសម្រាប់តារាសម្តែងនិងច្រៀងរាងខ្ពស់ស្រឡះសាច់សខ្ចី នាង សូដានីតា ក៍បង្ហាញភាពលេចធ្លោក្នុងអាជីពសិល្បះនាឆ្នាំ២០១៣នេះមិនចាញ់នាង សារ៉ាយ សក្ខិណា ផងដែរ ពោលក្រោយពេលដែលនាងបានសម្រេចចិត្តវិលមករកអាជីពសិល្បះជាថ្មីនោះការងារសិល្បះរបស់នាងបានធ្លាក់មកជាហូរហែរ។
អតីតតារាចម្រៀងនៅក្នុងផលិតកម្មKH Promotion រូបនេះបានរើខ្លួនឡើងវិញក្នុងវិថីសិល្បះបន្ទាប់ពីស្ងប់ស្ងាត់ដោយសម្ងំលាក់ខ្លួនរស់នៅបរទេស ក្រោយភ្ជាប់និស្ស័យស្នេហ៍ឆ្លងសមុទ្រជាមួយបុរសអានិកជនខ្មែរនៅក្នុងប្រទេសប៊ែលហ្សិច។
ប៉ុន្តែក្រោយពីស្នេហាឆ្លងសមុទ្រនេះបានដាច់ដោចទៅវិញនោះ តារាស្រីរូបនេះបានវិលមកកាន់សង្វៀនសិល្បះជាថ្មីម្តងទៀត ក្រោមវត្តមានជាពិធីការីនីប្រចាំស្ថានីយទូរទស្សន៍ CTN ។ មិនយូរប៉ុន្មាននាងក៍បានហក់ចូលសម្តែងក្នុងខ្សែភាពយន្តបន្តទៀត ក្រោយពេលដែលនាងក៍ធ្លាប់បានប្រឡូកក្នុងអាជីពសម្តែងនេះម្តងរួចមកហើយ មុនពេលដែលនាងបានបាត់មុខមួយរយះនោះ។
ខ្សែរឿងដែលនាងកំពុងតែដំណើរការថតនោះគឺរឿង ភ្លើងព្យាបាទ ដែលផលិតឡើងដោយស្ថានីយទូរទស្សន៍ខ្មែរប៉ុស្តិ៍លេខ៩ក្នុងវត្តមានជាតួឯកស្រីជាមួយតួឯកប្រុសលោក សុវណ្ណមករា ខណះពេលដែលរូបនាងក៍បានទទួលតំណែងជាពិធីការីនីក្នុងកម្មវិធីផ្សាយផ្ទាល់តន្ត្រីទេសចរណ៍របស់ក្រុមហ៊ុនស្រាបៀរអង្គរផងដែរនោះ។
ក្នុងវត្តមានសម្តែង និងជាពិធីការីនីស្ទើរមិនដាច់សូរនេះ នាងក៍ជាសមាជិកម្នាក់ដែលមិនអាចខ្វះបានក្នុងក្រុមបង្ហាញម៉ូតCambodia Super Model ក្នុងពេលដែលក្រុមបង្ហាញម៉ូតមួយនេះចេញសម្តែងក្នុងកម្មវិធីផ្សេងៗទាំងក្នុងនិងក្រៅប្រទេស។
បើទោះបីជាការបង្ហាញវត្តមានរបស់នាង សូដានីតា ជាថ្មីនេះមិនបានធ្វើឲ្យនាងក្លាយជាតារាចម្រៀងក្នុងផលិតកម្មណាមួយក៍ដោយ ប៉ុន្តែតំណែងជាពិធីការិនី និង ការសម្តែងរបស់នាងកំពុងតែបង្កើនប្រជាប្រិយភាពក្នុងអាជីពសិល្បះរបស់នាងឲ្យកាន់តែលេចធ្លោនៅក្នុងឆ្នាំ២០១៣នេះផងដែរ៕ ស.រ