ជិះម៉ូតូរត់គេចពីក្រុមក្មេងអន្ធពាលដេញវាយជ្រុលទៅបុកគូទរថយន្តស្លាប់
Cambodia News
ភ្នំពេញ៖ កាលពីវេលាម៉ោង ២៤និង៤៥នាទីរំលងអាធ្រាត្រឈានចូលថ្ងៃទី២៤ ខែមិនា យុវជនម្នាក់បានស្លាប់បាត់បង់ជីវិតភ្លាមៗនៅនឹងកន្លែងកើតហេតុ ដោយសារជិះម៉ូតូបុកគូទរថយន្តកុងតឺន័រ ដែលចតស្ងៀម នៅលើ កំណាត់ផ្លូវជាតិលេខ៤ ស្ថិតក្នុងភូមិត្រពាំងគល់ សង្កាត់កន្ទោក ខណ្ឌពោធិ៍សែនជ័យ។
យុវជនរងគ្រោះខាងលើនេះ ឈ្មោះ អ៊ុន ម៉ាប់ អាយុ២២ឆ្នាំ មុខរបរកម្មកររោងចក្រកាត់ដេរ មានទីលំនៅភូមិរំលិច ឃុំរលាំងគ្រើល ស្រុកសំរោងទង ខេត្តកំពង់ស្ពឺ។
មុនពេលកើតហេតុ យុវជនរងគ្រោះរូបនេះ ជិះម៉ូតូមួយគ្រឿង ម៉ាកហុងដាវ៉េវអ៊ី ពណ៌ខ្មៅ ពាក់ស្លាកលេខ កំពង់ឆ្នាំង1A-1059 រត់គេចពីក្មេងអន្ធពាលដេញវាយ ហើយជ្រុលទៅបុកគូទរថយន្តកុងតឺន័រមួយគ្រឿង ដែលចតស្ងៀម បណ្តាលឲ្យដួលបោកខ្លួនស្លាប់ភ្លាមៗនៅនឹងកន្លែង៕ ហេង នាង
