ម៉ូស្គូគម្រាមពិនិត្យឡើងវិញបដិភាគប្រាក់អឺរ៉ូនៅក្នុងស្តុករូបិយវត្ថុខ្លួន
ពាក្យព្រមាននេះ ត្រូវបានបន្លឺឡើង ដោយលោកនាយករដ្ឋមន្ត្រីរុស្ស៊ី មេដវេ ដេវ ក្នុងបទសម្ភាសន៍ឲ្យទៅអ្នកកាសែតអឺរ៉ុបមួយចំនួន-សម្ភាសន៍ដែលចេញ ផ្សាយថ្ងៃនេះ -ថ្ងៃ ដែលគាត់ទទួលជួបចរចានៅម៉ូស្គូ ជាមួយ លោកប្រធាន គណៈកម្មការអឺរ៉ុប José Manuel Barroso។ លោកមេដវេដេវ គូសបញ្ជាក់ថា ការរុះរើបដិភាគប្រាក់អឺរ៉ូនោះ នឹងប្រព្រឹត្តទៅ ប្រសិនបើដំណោះស្រាយវិបត្តិហិរញ្ញ វត្ថុនៅប្រទេសChypre ដែលធ្វើតាមសំណើសហភាពអឺរ៉ុប ស្រាប់តែនាំឲ្យខូចដល់ផលប្រយោជន៍របស់រុស្ស៊ី។
ជាបឋម គួរនិយាយថា បច្ចុប្បន្នក្នុងស្តុករូបិយវត្ថុរបស់រដ្ឋរុស្ស៊ី ដែលមានទឹកប្រាក់ ជាង ៥២២.០០០លានដុល្លារស.រ.អា. ទ្រង់ទ្រាយនៃបដិភាគនេះគឺដូចតទៅ៖ ៤៥,៥% ជាលុយដុល្លារ អាមេរិក, ៤១,៧% ជាលុយអឺរ៉ូ, ៩,២% ជាលុយ Livre Sterling អង់គ្លេស, ១,៤% ជាលុយដុល្លារ កាណាដា, ១,៣% ជាលុយ Yen ជប៉ុន និង០,៦% ជាលុយ SDR ដំកល់ក្នុង មូលនិធិរូបិយវត្ថុ អន្តរជាតិ FMI។
ជាការកត់សម្គាល់ ពេលដែលប្រាក់អឺរ៉ូ ទើបដាក់ឲ្យចាយនៅដើមឆ្នាំ១៩៩៩បដិភាគប្រាក់នេះ បានមានទម្ងន់តែ២៥% ប៉ុណ្ណោះ នៅក្នុងស្តុករូបិយវត្ថុរបស់សហព័ន្ធរុស្ស៊ី។ ប៉ុន្តែពីមួយឆ្នាំទៅមួយឆ្នាំ ប្រាក់អឺរ៉ូបានទទួលការជឿទុក ចិត្តកាន់តែខ្ពស់ឡើងពីរដ្ឋរុស្ស៊ី លុះទាល់តែធនាគារកណ្តាលរុស្ស៊ីដំឡើងបដិ ភាគប្រាក់អឺរ៉ូ ដល់ជាង៤០% ហើយបន្ថយបន្តិចម្តងៗទម្ងន់ប្រាក់ដុល្លារអាមេរិកឲ្យចុះពីជាង៦០% រហូតដល់ក្រោម៥០% នៅក្នុងស្តុកនោះ។
ឥឡូវក្រោយពីប្រទេស Chypre ដែលជាសមាជិកសហភាពអឺរ៉ុប និងដែលស្ថិតនៅក្នុងក្រុម ១៧ប្រទេសចាយលុយអឺរ៉ូ ជាជំនួសរូបិយវត្ថុជាតិខ្លួន បោកកញ្ជ្រោក ដោយវិបត្តិហិរញ្ញវត្ថុ ទាំងបង្ខំចិត្តបំពេញតាមបទណែនាំនៃគណៈកម្មការអឺរ៉ុបនិងធនាគារ កណ្តាលអឺរ៉ុប ត្រូវហូតពន្ធពីប្រាក់ដែលមានផ្ញើទុកនៅតាមធនា គារ Chypre ហើយដែលមួយភាគធំ មានម្ចាស់វាគឺ ជាតិរុស្ស៊ីទេតើ រួចដែលចំហាយវាអាចជះទាំងទៅលើប្រទេសផ្សេងទៀតដែលចាយលុយអឺរ៉ូ ដែរបែបយ៉ាង Espagne Portugal Italie ជាដើមដែលអាចអនុវត្តការហូតពន្ធបែបនេះដែរ បានជារុស្ស៊ីចាប់ផ្តើមបាត់បង់ការជឿទុកចិត្តរបស់ខ្លួនលើប្រាក់ អឺរ៉ូ។
មិនមែនចៃដន្យទេ ដែលលោកនាយករដ្ឋមន្ត្រីរុស្ស៊ីមេដវេដវ ក្នុងបទសម្ភាសន៍នោះ ដោយ ទិតៀនទង្វើសហភាពអឹរ៉ុបចំពោះប្រទេស Chypre បានប្រៀបប្រដូចសហភាពនេះទៅនឹង ដំរីដែលបោលចូលហាងដ៏តូចចង្អៀតលក់វត្ថុផុយស្រួយងាយបែក បែបយ៉ាងប្រទេស Chypre ដ៏តូចច្រមក់។ តាមលោកមេដវេដេវ វិធានការស្នើដោយសហភាពអឺរ៉ុបគឺប្រៀបបាននឹងសេចក្តីសម្រេចខ្លះ អនុម័តដោយអំណាចសូវៀត ដែលមានន័យជាការដកហូតទ្រព្យសម្បត្តិអ្នកដទៃតាមផ្លូវច្បាប់និង ជាការរឹបអូសយកមិនធ្លាប់មានដូចនូវប្រាក់សន្សំរបស់ពួកម្ចាស់ លុយ។
ប្រមុខរដ្ឋាភិបាលរុស្ស៊ីកត់សម្គាល់ថា ឥឡូវពិភពលោក រស់នៅក្នុងសតវត្សរ៍ទី២១ទៅហើយ ក្នុងសេដ្ឋកិច្ចទីផ្សារ ហើយរុស្ស៊ីទទូចឲ្យមានការគោរពខានមិនបាន ចំពោះសិទ្ធិ សម្រាប់មានកម្មសិទ្ធិផ្ទាល់ខ្លួន៕ដោយ កែវ ឆាយា (RFI)
