បើកម៉ូតូទៅប៉ះដៃម៉ូតូមួយទៀតដួលចូលរថយន្តរបួសធ្ងន់ម្នាក់ស្រាល ២នាក់
Cambodia News
ភ្នំពេញ៖ កាលពីវេលាម៉ោង៥និង៤០នាទីល្ងាចថ្ងៃទី២១ ខែមីនា យុវជន ៣នាក់ជិះម៉ូតូ បើកវ៉ាទៅប៉ះនឹងដៃចង្កូតម៉ូតូ១ គ្រឿងហើយរេចង្កូតចូលរថយន្ត បណ្ដាលឲ្យដួលបានរងរបួសធ្ងន់ម្នាក់ និង២នាក់ទៀតរងរបួសស្រាល ស្ថិតតាមបណ្ដោយផ្លូវសហព័ន្ធរុស្ស៊ី ស្ថិតក្នុងភូមិក្បាលដំរី សង្កាត់កាកាប ខណ្ឌពោធិ៍សែនជ័យ។
ជនរងគ្រោះ១-ឈ្មោះហុង ភេទប្រុស អាយុជាង៣០ឆ្នាំ ជាជាងជួសជុលរថយន្ត ស្នាក់នៅផ្ទះជួលក្នុងភូមិព្រៃជី សាក់ សង្កាត់ចោមចៅ ខណ្ឌពោធិ៍សែនជ័យ ជាអ្នកបើកម៉ូតូបានរងរបួសធ្ងន់, ២-ឈ្មោះសាយ សុខគាង ភេទស្រី អាយុ៣៦ឆ្នាំ មុខរបរមេផ្ទះ ស្នាក់នៅភូមិព្រៃព្រីងខាងជើង សង្កាត់ចោមចៅ ខណ្ឌពោធិ៍សែនជ័យ ជាអ្នករួមដំណើរ ជិះពីក្រោយ រងរបួសស្រាល និង៣-ឈ្មោះហេង ពេជ្រម៉ូណីកា ភេទស្រី អាយុ៣ឆ្នាំ ជាកូនស្រីរបស់ស្ត្រីរងគ្រោះ សាយ សុខគាង រងរបួសស្រាល។
មុនពេលកើតហេតុគេឃើញជនរងគ្រោះបើកបរម៉ូតូម៉ាកវីវ៉ា ពណ៌ខ្មៅ ស៊េរីឆ្នាំ២០០៦ ពាក់ស្លាកលេខ តាកែវ 1A-4848 ក្នុងទិសដៅពីកើតទៅលិច លុះមកដល់ចំណុចកើតហេតុខាងលើជនរងគ្រោះបានបើកវ៉ាឆ្ពោះទៅមុខយ៉ាង លឿន ក៏ទៅប៉ះនឹងដៃចង្កូតម៉ូតូ១គ្រឿងទៀតបណ្ដាលឲ្យ ឮដួលចូលទៅក្រោមរថយន្ត១គ្រឿងម៉ាកហ៊ីណូតែម្ដង។
បច្ចុប្បន្នជនរងគ្រោះត្រូវបាន គេដឹកយកទៅសង្គ្រោះនៅគ្លីនិកឯកជន ចំណែកម៉ូតូនិងរថយន្តត្រូវបានសមត្ថកិច្ច នគរបាលចរាចរយកទៅរក្សាទុកនៅអធិការដ្ឋាននគរបាលខណ្ឌពោធិ៍សែនជ័យ រង់ចាំដោះស្រាយជាក្រោយ៕ ហេង នាង
