យោធាចិនទទួលស្គាល់ថាបានប្រើរ៉ាដាសំរាប់កំណត់គោលដៅបាញ់ទៅលើនាវាជប៉ុន
ទាហានចិនបានទទួលស្គាល់ជាលើកទី មួយថា នាវាចំបាំងចិនពិតជាបានប្រើរ៉ាដាសំរាប់បាញ់ទៅលើនាវា ពិឃាតជប៉ុន នៅប្រជុំកោះសេនកាគូ ដែលជាដែនកោះជម្លោះរវាងប្រទេសទាំងពីរ ប្រាកដមែន។ នេះបើយោងតាមការប្រកាសប្រាប់របស់ទីភ្នាក់ងារសារព័ត៌មានជប៉ុន Kyodo នៅថ្ងៃចន្ទនេះ។ កន្លងមក ជប៉ុនតែងតែចោទប្រកាន់ជាញឹកញាប់ថា អំពីប្រការដែលនាវាចិនបានប្រើរ៉ាដានេះ ប៉ុន្តែចិនតែងតែបដិសេធជានិច្ច។
ទីភ្នាក់ងារសារព័ត៌មានជប៉ុន Kyodo បានប្រាប់នៅថ្ងៃចន្ទនេះថា យោធាចិនបានទទួលស្គាល់ជាលើកទីមួយថា នាវាចំបាំងចិនពិតជាបានប្រើរ៉ាដាសំរាប់បាញ់ទៅលើនាវា ពិឃាតជប៉ុន នៅប្រជុំកោះសេនកាគូ ដែលជាកោះជម្លោះរវាងប្រទេសទាំងពីរ។
កន្លងមក ជប៉ុនតែងតែចោទប្រកាន់ជាញឹកញាប់ថា កាលពីថ្ងៃទី៣០ មករា នាវាចំបាំងចិនមួយគ្រឿង បានប្រើរ៉ាដាសម្រាប់ បាញ់ទៅលើនាវាជប៉ុន។
យោងតាមសារព័ត៌មាន Kyodo មេដឹកនាំយោធាជាន់ខ្ពស់ដែលគេមិនបានស្គាល់អត្តសញ្ញាណ បានទទួលស្គាល់ថា ហេតុការណ៍នេះពិតជាបានកើតឡើងពិតប្រាកដមែន។
ហើយគឺមេបញ្ជាការនាវាចំបាំងចិន ជាអ្នកសំរេចអោយធ្វើឡើង។ ប៉ុន្តែ មេដឹកនាំយោធាបានពន្យល់ថា ការសំរេចប្រើរ៉ាដានេះ មិនមែនជាការគ្រោងទុកជាមុននោះទេ។ វាជាការសំរេចចិត្តមួយដ៏តក់ក្រហល់។
មេដឹកនាំយោធាទាំងនេះបានប្រាប់ថា កាលពីថ្ងៃ៣០ មករា កន្លងមក នាវាចំបាំងចិននិងនាវាពិឃាតជប៉ុនស្ថិតនៅចំងាយពីគ្នាត្រឹមតែ ៣គីឡូម៉ែត្រតែប៉ុណ្ណោះ។ ហើយនាវារបស់ប្រទេសទាំងពីរស្ថិតនៅចំងាយប្រហែលជា ១១០ គីឡូម៉ែត្រ ទៅ ១៣០គីឡូម៉ែត្រ ពីភាគខាងត្បូងនៃប្រជុះកោះសេនកាគូ ដែលជាដែនកោះជំលោះរវាងប្រទេសទាំងពីរ។
ដូច្នេះ មេបញ្ជាការនាវាចំបាំងចិន បានសំរេចអោយដាក់ដំណើរការរ៉ាដារដែលប្រើសំរាប់បាញ់របស់ខ្លួន គឺស្របទៅតាមកិច្ចសន្យារបស់ទាហានចិន។ ប៉ុន្តែ មេបញ្ជាការនាវាចំបាំងចិនមិនបានសួរនាំផ្នែកបញ្ជាការទ័ពជើងទឹក ជាមុននោះឡើយ។
ដោយឡែក ក្រុងតូក្យូក៏បានចោទក្រុងប៉េកាំងផងដែរថា បានប្រើរ៉ាដានាវាចំបាំងខ្លួនដើម្បីកំណត់គោលដៅបាញ់ ឧទ្ធម្ភាគចក្រជប៉ុន កាលពីពាក់កណ្តាលខែ មករាកន្លងទៅ។
ប៉ុន្តែ នៅថ្ងៃចន្ទម្សិលមិញ ចិនបានបដិសេធការចោទប្រកាន់នេះ សារជាថ្មីម្តងទៀត។
ហើយទន្ទឹមនេះដែរ កងទ័ពជើងទឹកចិនបានចេញសេចក្តីថ្លែងការមួយថា ព័ត៌មានដែលកាសែតបរទេសបានសរសេរទាក់ទងទៅនឹងបញ្ហាអស់នេះ សុទ្ធតែមានបំណងអាក្រក់ ដើម្បីបោកប្រាស់មតិអន្តរជាតិ។
គួររំលឹកថា ប្រជុំកោះគ្មានមនុស្សនៅ សេនកាគូ ដែលចិនហៅថា ប្រជុំកោះ Diaoyu នៅតែជាបញ្ហាជម្លោះអចិន្រ្តៃយ៍ រវាងចិន និងជប៉ុន។ តាំងតែពីពេលដែលជប៉ុនទិញយកមួយភាគនៃកោះនេះ ដាក់អោយមកជាដែនដីជាតិខ្លួន កាលពីចុងឆ្នាំ ២០១២ កន្លងមក ជាញឹកញយ គេតែងឃើញមានកប៉ាល់ចិន និងយន្តហោះចិននានាបើកចូលមកជុំវិញដែនទឹកនេះ បង្កអោយរដ្ឋាភិបាលជប៉ុនក្តៅក្រហាយ៕ដោយ ព្រំ សឿន សូលីណា (RFI)
