ពលរដ្ឋបុរីកីឡាទាមទារឲ្យតុលាការក្រុងដោះស្រាយបណ្តឹងប្តឹងក្រុមហ៊ុនផានអ៊ីមិច
ភ្នំពេញ: នៅព្រឹកថ្ងៃទី១២ មីនា ២០១២ ប្រជាពលរដ្ឋបុរីកីឡាប្រមាណជា ៥០ នាក់ បាននាំគ្នាទៅប្រមូលផ្តុំនៅមុខសាលាដំបូងរាជធានីភ្នំពេញ ដើម្បីជំរុញឲ្យតុលាការធ្វើការដោះស្រាយ ចំពោះពាក្យបណ្តឹងដែលបានប្តឹងលោកស្រី ស៊ុយ សុផាន ប្រធានក្រុមហ៊ុន ផាន អ៊ីមិច ដែលបានធ្វើការឈូសឆាយបំផ្លិចផ្លាញផ្ទះសម្បែង និងទ្រព្យសម្បត្តិរបស់ពួកគាត់ កាលពីថ្ងៃទី៣ ខែមករា ឆ្នាំ២០១២។
បន្ទាប់ពីមានការប្រមូលផ្តុំគ្នា លើកបដារទាមទារឲ្យមានការដោះស្រាយបណ្តឹង និងមានការស្រែកទាមទារឲ្យតុលាការឯករាជ្យនោះ តំណាងប្រជាពលរដ្ឋ ២នាក់ ត្រូវបានហៅឲ្យចូលទៅក្នុងតុលាការដើម្បីពិភាក្សា។
អ្នកស្រី ជុំ ង៉ាន់ តំណាងប្រជាពលរដ្ឋ ដែលបានចូលទៅក្នុងតុលាការ បាននិយាយថា អ្នកស្រីក្រឡាបញ្ជីឈ្មោះ ហុង ប៊ុនហួរ បានប្រាប់គាត់ថា តុលាការកំពុងតែធ្វើការ ពីព្រោះខាងក្រសួងមហាផ្ទៃចុះមកធ្វើបញ្ហាប្រជាពលរដ្ឋបុរីកីឡា នៅថ្ងៃ ១២ មីនា នេះ បើសិនជាថ្ងៃនេះធ្វើមិនហើយឲ្យទូរស័ព្ទសួរគាត់នៅម៉ោង ២សៀល ដើម្បីឲ្យដឹងដំណឹង។
ចំណែកលោកស្រី ស៊ុយ សុផាន ប្រធានក្រុមហ៊ុន ផាន អ៊ីមិច បានឲ្យដឹងថា បញ្ហាប្រជាជនដែលនៅសេសសល់វាមានជាង ១៨គ្រួសារទេ មិនដូចជាការលើកឡើងរបស់ប្រជាជនទេ។ អ្វីដែលប្រជាជនមានឯកសារគ្រប់គ្រាន់ ក្រុមហ៊ុនមិនខ្វះផ្ទះជូនពួកគាត់ទេ សង់ ៨អគារ ហើយក៏នៅសល់បន្ទប់ដែរ។ ការដែលក្រុមហ៊ុនធ្វើអ្វីក៏ដោយ គឺមានការវាយតម្លៃពីសុរិយោដី ពីក្រសួងសេដ្ឋកិច្ច និងហិរញ្ញវត្ថុត្រឹមត្រូវ បានក្រុមហ៊ុនធ្វើ មិនមែនចេះតែធ្វើតាមអំពើចិត្តបានទេ។
សូមបញ្ជាក់ថា ការប្តឹងផ្តល់ក្រុមហ៊ុន ផាន អ៊ីមិច ពីសំណាក់ប្រជាពលរដ្ឋបុរីកីឡាបានកើតឡើង បន្ទាប់ពីក្រុមហ៊ុនបានយកគ្រឿងចក្រ ទៅឈូសឆាយផ្ទះប្រជាពលរដ្ឋ កាលពីថ្ងៃទី៣ ខែមករា ឆ្នាំ២០១២៕
