រថយន្តពីរគ្រឿងបុកគ្នា គាបមនុស្សម្នាក់ស្លាប់ក្នុងរថយន្ត
Cambodia News
ភ្នំពេញ៖ កាលពីវេលាម៉ោង២៤ និង៥០នាទីរំលងអាធ្រាត្រឈានចូលថ្ងៃទី១៩ ខែមិនា មានហេតុការណ៍គ្រោះថ្នាក់ចរាចរណ៍មួយបង្កឡើងរវាង រថយន្តកុងតឺន័រ បុកគ្នាជាមួយរថយន្តឡិចស៊ីស៣០០ នៅលើកំណាត់ផ្លូវជាតិលេខ១ ក្នុងភូមិជ្រោយអំពិល សង្កាត់ក្បាលកោះ ខណ្ឌមានជ័យ បណ្តាលឲ្យស្លាប់មនុស្សម្នាក់គាបជាប់ក្នុងរថយន្ត។
តាមប្រភពពត៌មានបានឲ្យដឹងថា បុរសម្នាក់ស្លាប់បាត់បង់ជីវិតក្នុងរថយន្តរបស់ខ្លួន ឈ្មោះ លឹម វ៉ាន់ឌី អាយុ៣១ឆ្នាំ មានទីលំនៅភូមិយកបាត ឃុំយកបាត ស្រុកកៀនស្វាយ បានបើកបរ រថយន្តម៉ាកឡិចស៊ីសRX300 ពាក់ស្លាកលេខ ភ្នំពេញ 2S-9599 ធ្វើដំណើរតាមបណ្តោយផ្លូវជាតិលេខ១ ក្នុងទិសដៅពីលិចទៅកើត បានបុកគ្នាជាមួយរថយន្តកុងតឺន័រ ពណ៌ស ពាក់ស្លាកលេខ ភ្នំពេញ 3A-7675 ដែលបើកបរបញ្ច្រាសទិសគ្នាពីកើតទៅលិច បណ្តាលឲ្យរថយន្តឡិចស៊ីស កំពិតខ្លួន រួញជាពីរគាបអ្នកបើកបររថយន្តស្លាប់យ៉ាងអាណោចអាធ័មបំផុត ក្នុងរថយន្ត។
ក្រោយកើតហេតុ សមត្ថកិច្ចបានចុះអន្តរាគមន៍វាស់វែង ដកហូតយករថយន្តបង្កទាំងពីគ្រឿង យកទៅរក្សាទុកនៅការិយាល័យជំនាញដើម្បីចាត់ការតាមច្បាប់។ ចំណែកឯសពបុរសរងគ្រោះក្រុមគ្រួសារលើកយកទៅតំកល់ធ្វើបុណ្យនៅវត្ត ចម្ប៉ា៕ ហេង នាង
