បុរសម្នាក់ត្រូវរថយន្តបុក ហើយកិនស្លាប់
Cambodia News
ភ្នំពេញ៖ កាលពីវេលាម៉ោង ២៣និង៣០នាទីយប់ ថ្ងៃទី១៨ ខែមិនា បុរសម្នាក់ខណៈកំពុងជិះម៉ូតូ ក៏ត្រូវរថយន្តបើកបុកពេញទំហឹងបណ្តាលឲ្យស្លាប់បាត់បង់ជីវិតភ្លាម់នៅកន្លែងកើតហេតុ ស្ថិតនៅតាមបណ្តោយផ្លូវហានឡូយ សង្កាត់ឃ្មួញ ខណ្ឌសែនសុខ។
សមត្ថកិច្ចដែលចុះទៅដល់កន្លែងកើតហេតុបានឲ្យដឹងមុនពេលកើតហេតុរថយន្ត មានមួយគ្រឿងម៉ាកហ៊ីយ៉ាន់ដាយ ពណ៌ខ្មៅ ពាក់ស្លាកលេខ បាត់ដំបង 3A-0334 បើកដោយបុរសម្នាក់តាមបណ្តោយផ្លូវហានណូយ ក្នុងទិសដៅពីជើងទៅត្បូង ដោយបានបើកយ៉ាងលឿន ហើយរេចង្កូតបុកម៉ូតូស្កូបពីរបស់បុរសម្នាក់កំពុងជិះបញ្ច្រាស ទិសគ្នា បណ្តាលឲ្យបុរសជាម្ចាស់ម៉ូតូត្រូវរថយន្តកិនស្លាប់នៅនឹងកន្លែង កើតហេតុតែម្តង។
ចំណែករថយន្តបង្កហេតុបានបន្តរត់គេចក៏អូសម៉ូតូរបស់ជនរងគ្រោះ នៅក្រោមរថយន្តជាង 100ម៉ែត្រ ទើបម៉ូតូខ្ទាតចេញពីរថយន្តបង្ក ប៉ុន្តែរថយន្តព្យាយាមបើករត់គេចរហូតទៅដល់ក្រោមស្ពានលីយ៉ុងផាត ទើបត្រូវសមត្ថកិច្ចឃាត់ជាប់។
បន្ទាប់ពីកើតហេតុសមត្ថកិច្ចជំនាញចុះមកអន្តរាគមន៍វាស់វែងនាំយករថយន្ត បង្កទៅរក្សាទុកនៅការិយាល័យចរាចរជើងគោករាជធានីភ្នំពេញដើម្បី ដោះស្រាយតាមផ្លូវច្បាប់។ ចំណែកសាកសពបុរសរងគ្រោះត្រូវសមត្ថកិច្ច ទំនាក់ទំនងទៅក្រុមគ្រួសារឲ្យមកទទួលយកសពទៅធ្វើបុណ្យតាមប្រពៃណី៕ ហេង នាង
