សមត្ថកិច្ច ចុះបង្ក្រាបគ្រឿងញៀន នៅមុខប្រលានយន្តហោះអន្តរជាតិភ្នំពេញ
Cambodia News
ភ្នំពេញ៖ កាលពីព្រលប់ថ្ងៃទី១៣ ខែមិនា សមត្ថកិច្ចកងរាជអាវុធហត្ថរាជធានីភ្នំពេញ ដឹកនាំដោយលោកឧត្តមសេនីយ៍មេបញ្ជាការ យ៉ា គឹមអ៊ី បានបើកប្រតិបត្តិការ បង្ក្រាបទីតាំងជួញដូរថ្នាំញៀនដ៏ធំមួយកន្លែង ស្ថិតក្នុងភូមិក្បាលដំរី សង្កាត់កាកាប ខណ្ឌពោធិ៍សែនជ័យ។
ប្រតិបត្តិការខាងលើនេះ ជំហានដំបូងសមត្ថកិច្ច បានចុះឆែកឆេរ ផ្ទះល្វែងចំនួន៥ ល្វែង ដកហូតបានថ្នាំញៀន ប្រភេទម្សៅហេរ៉ូអីនជាង១០គីឡូក្រាម ឃាត់ខ្លួនមនុស្ស៥នាក់ កាំភ្លើងខ្លីមួយដើម និងរថយន្ត៤គ្រឿង។
ជនសង្ស័យជាមេខ្លោង២នាក់ប្តីប្រពន្ធ ឈ្មោះជាតិ ហ៊ីវអ៊ាង ហៅហាក់អ៊ាង អាយុ៤៧ឆ្នាំ ជាប្តី ហើយជនសង្ស័យ រូបនេះក៏ធ្លាប់បានជាប់ពន្ធនាគារនៅខេត្តបន្ទាយមានជ័យផងដែរ និងប្រពន្ធឈ្មោះឡុង វ៉ាន់ធី អាយុ៤៤ឆ្នាំ។
បច្ចុប្បន្ន ជនសង្ស័យ និងវត្ថុតាងទាំងនេះ ត្រូវបាននាំយក ទៅឃុំខ្លួន ទីបញ្ជាការដ្ឋាន អាវុធហត្ថរាជធានីភ្នំពេញ ដើម្បីកសាងសំណុំរឿង បញ្ជូនទៅកាន់តុលាការ៕ ហេង នាង
