ក្រុមចោរប្លន់ពីរនាក់ចូលប្លន់ និងរំលោភស្ត្រីម្នាក់
Cambodia News
ភ្នំពេញ៖ កាលពីវេលាម៉ោង១១និង០០នាទីព្រឹក ថ្ងៃទី១៣ ខែមិនា ស្ត្រីមួយរូបបាននិយាយប្រាប់សមត្ថកិច្ចថា ក្រុមចោរប្លន់ពីរនាក់បានចូលធ្វើសកម្មប្លន់ដល់ក្នុងលំនៅឋានរបស់ គាត់ ស្ថិតនៅភូមិខ្លែងរលើង សង្កាត់ទឹកថ្លា ខណ្ឌសែនសុខ ហើយថែមទាំងធ្វើសកម្មភាពរំលោភសេពសន្ថវៈ និងថតរូបភាពវីដេអូឃ្លីប តាមទូរស័ព្ទ រួមព្រមានជនរងគ្រោះថា បើហ៊ានប្តឹងសមត្ថកិច្ចពួកគេ និងយករូបភាពនៃសកម្មភាពវីដេអូឃ្លីប ទៅបង្ហោះក្នុង face-book ។
ស្ត្រីរងគ្រោះក្នុងអំពើប្លន់ខាងលើនេះ ឈ្មោះ ម-ស-ម អាយុ២៤ឆ្នាំ ស្នាក់នៅផ្ទះកើតហេតុខាងលើ។ ស្ត្រីរូបនេះបានរៀបរាប់ថា ក្រុមចោរប្លន់មានគ្នា២នាក់ ជិះម៉ូតូមួយគ្រឿង ចូលមកធ្វើសកម្មភាពប្លន់ ដោយចាប់ចងដៃ ចងជើង រួចយកកាំបិទភ្ជង់បំពង់ក ហើយធ្វើសកម្មភាពរំលោភសេពសន្ថវៈលើរាងកាយគាត់ រួចហើយក្រុមចោរបានប្រមូលយកគ្រឿងអលង្ការ និងទូរស័ព្ទដៃរបស់គាត់រួចនាំគ្នាជិះម៉ូ តូរត់គេចខ្លួនបាត់។
ស្ត្រីដដែលបានបន្តថា មុនក្រុមចោរចាកចេញទៅពួកចោរបានព្រមានមិនឲ្យគាត់ប្តឹងសមត្ថកិច្ច ឡើយ ដោយពួកចោរនិយាយថា បើហ៊ានប្ដឹងសមត្ថកិច្ច គេនឹងយករូបភាពវីដេអូឃ្លីប នៃសកម្មភាពរំលោភសេពសន្ថវៈទៅបង្ហោះលើ face-book ។
គួរបញ្ជាក់ថា មុនពេលក្រុមចោរប្លន់បានធ្វើសកម្មភាពឡើង ខណៈពេលដែលស្ត្រីរងគ្រោះ កំពុងស្ថិតនៅបន្ទប់ក្នុងផ្ទះជាមួយកូនស្រីអាយុជាង១ខួប ចំណែកប្តីរបស់ស្ត្រីរងគ្រោះខាងលើនេះ ជាជនជាតិកូរ៉េ ហើយពេលកើតហេតុនោះ ចៃដន្យប្តីរបស់ជនរងគ្រោះចេញទៅធ្វើការបាត់ ទើបក្រុមចោរឃើញឱកាសល្អក៏ធ្វើសកម្មភាពប្លន់រំលោភតែម្តង៕ ហេង នាង
