អ៊ីរ៉ង់និងប៉ាគីស្ថានបន្តគំរោងសាងសង់បំពង់បង្ហូរប្រេងកាត
នៅថ្ងៃចន្ទម្សិលមិញនេះ ប្រទេសអ៊ីរ៉ង់ និងប្រទេសប៉ាគីស្ថាន បានចាប់ផ្តើមបន្តការសាងសង់បំពង់បង្ហូរប្រេងកាតដែលមានប្រវែង១៨០០គីឡូម៉ែត្រ ស្ថិតនៅ ភាគខាងជើងការ៉ាឈី ប្រទេសប៉ាគីស្ថាន។ ការសាងសង់នេះ មានតំលៃជាទឹកប្រាក់ប្រមានជា ៧ពាន់៥រយ លានដុល្លារ នឹងអាចអោយអ៊ីរ៉ង់ផ្តល់នូវឧស្ម័ន២១លានម៉ែត្រគូប ក្នុងមួយថ្ងៃ ដល់ប៉ាគីស្ថាន ចាប់ពីខែធ្នូ ឆ្នាំ ២០១៤។ ប្រទេសប៉ាគី ស្ថានមានការរារែកចិត្តច្រើនមុននឹងសំរេចចិត្តសាងសង់ បំពង់បង្ហូរប្រេងកាតនេះ ព្រោះសហរដ្ឋអាមេរិកធ្លាប់ដាក់សម្ពាធថាក្រុងអ៊ីស្លាម៉ាបាដអាចនឹងទទួលនូវទណ្ឌកម្ម ប្រសិនបើខ្លួនអនុវត្តគំរោងនេះជាមួយក្រុងតេហេរ៉ង់។
ប្រធានាធិបតី អ៊ីរ៉ង់ លោក Mahmoud Ahmadinejad និងប្រធានាធិបតីប៉ាគីស្ថាន លោក Asif Ali Zardari ព្រមទាំងគណប្រតិភូជាច្រើនរូបមកពីប្រទេសទាំងពីរ បានចុះទៅសម្ពោធបើកការដ្ឋានសាងសង់បំពង់បង្ហូរប្រេងកាត ដោយផ្ទាល់ នៅថ្ងៃចន្ទម្សិលមិញ នៅជិត Chabahar ស្ថិតនៅភាគអាគ្នេយ៍ប្រទេសអ៊ីរ៉ង់។
ក្នុងប្រវែង ១៨០០ គីឡូម៉ែត្រ បំពង់បង្ហូរប្រេងកាត ដែលត្រូវសាងសង់នេះ មានទីតាំងនៅភាគខាងជើងការ៉ាឈី ប្រទេសប៉ាគីស្ថាន។ បំពង់ប្រេងកាតនេះមានតំលៃជាទឹកប្រាក់ប្រហែលជា ៧ពាន់៥រយ លានដុល្លារ អាចអោយអ៊ីរ៉ង់ផ្តល់នូវឧស្ម័ន២១លានម៉ែត្រគូប ក្នុងមួយថ្ងៃ ដល់ប៉ាគីស្ថានបាន ចាប់ពីខែធ្នូ ឆ្នាំ ២០១៤។ គួររំលឹកថា វិស័យថាមពលប៉ាគីស្ថានកំពុងតែជួបនូវវិបត្តិធ្ងន់ធ្ងរ ដែលជះឥទ្ធិពលដល់គុណភាពផ្នែកឧស្សាហកម្ម។
ក្រុងប៉ាគីស្ថាន មានគំរោងប្រើឧស្ម័នរបស់អ៊ីរ៉ង់ សំរាប់ការផលិតអគ្គិសនី ២០ភាគរយ ក្នុងស្រុក។
យោងតាមប្រធានាធិបតីប្រទេសទាំងពីរ ការបញ្ចប់ការសាងសង់បំពង់បង្ហូរប្រេង នេះ គឺជាកត្តាបង្ហាញនូវសន្តិភាព សុវត្ថិភាព និងការរីកចំរើន ព្រមទាំងពង្រឹងនូវទំនាក់ទំនងសេដ្ឋកិច្ចរវាងប្រទេសទាំងពីរអោយ រឹងមាំទៀតផង។
គួររំលឹកថា គំរោងសាងសង់បំពង់បង្ហូរប្រេងកាតរបស់អ៊ីរ៉ង់ និងប៉ាគីស្ថាន បានចាប់ដាក់អោយអនុវត្តតាំងពីឆ្នាំ ២០១០ មកម្ល៉េះ។ ការសាងសង់នៅប៉ែកខាងអ៊ីរ៉ង់ ជិតបញ្ចប់អស់ហើយ។ ដោយឡែកប្រទេសប៉ាគីស្ថានវិញ ជួបប្រទះការខ្វះខាតថវិកាសាងសង់។ ថ្មីៗនេះ ក្រុងតេហេរ៉ង់ បានសំរេចយល់ព្រមជួយចេញប្រាក់អោយដល់ប៉ាគីស្ថាន មួយភាគបីនៃថវិកាសាងសង់ តាមរយៈក្រុមហ៊ុនសាងសង់របស់អ៊ីរ៉ង់មួយ។
កន្លងមក ប្រទេសប៉ាគីស្ថានមានការរារែកនឹងសំរេចការសាងសង់នេះណាស់ ព្រោះខ្លួនបានរងនូវសម្ពាធរបស់សហរដ្ឋអាមេរិក ដែលធ្លាប់លើកឡើងថា ក្រុងអ៊ីស្លាម៉ាបាដអាចនឹងទទួលទណ្ឌកម្ម ប្រសិនបើអនុវត្តនូវគំរោងសាងសង់នេះ ជាមួយប្រទេសអ៊ីរ៉ង់។
សហរដ្ឋអាមេរិក ព្យាយាមអោយប្រទេសអ៊ីរ៉ង់ ធ្លាក់ក្នុងភាពឯកា ព្រោះមិនចង់អោយអ៊ីរ៉ង់ផលិតបានអាវុធនុយក្លេអ៊ែរ៕ដោយ ព្រំ សឿន សូលីណា (RFI)