ទីក្រុងវ៉ាស៊ីតោន៖« ការគំរាមកំហែងរបស់កូរ៉េខាងជើង មិនមែនជាដំណោះស្រាយទេ »
បន្ទាប់ ពីក្រុមប្រឹក្សាសន្តិសុខ អង្គការសហប្រជាជាតិបានដាក់ទណ្ឌកម្មថ្មីប្រឆំាងកូរ៉េខាងជើង និងប្រតិកម្មគំរាមខ្លំាងក្លាពីសំណាក់កូរ៉េខាងជើងមក សហរដ្ឋអាមេរិកបានបញ្ចេញប្រតិកម្មតបវិញ ដោយព្រមានថា ការគំរាមកំហែងរបស់កូរ៉េខាងជើង ដូចយ៉ាងការប្រកាសសង្រ្គាមនុយក្លេអ៊ែរទល់នឹងអាមេរិក និងកូរ៉េខាងត្បូង ការកាត់ផ្តាច់ខ្សែទូរស័ព្ទផ្ទាល់ជាមួយកូរ៉េខាងត្បូង ឬមួយក៏លុបចោលទាំងអស់នូវកិច្ចព្រមព្រៀងមិនឈ្លានពានជាមួយនឹងកូរ៉េ ខាងត្បូងក្តី មិនមែនជាដំណោះស្រាយទេ។
នេះ គឺជាប្រតិកម្មរបស់លោក Josh Earnest អ្នកនំាពាក្យទី២របស់លោកប្រធានាធិបតីអាមេរិកបារ៉ាក់ អូបាម៉ា នាឱកាសផ្តល់ព័ត៌មានប្រចំាថ្ងៃឲ្យអ្នកកាសែតនៅវិមានប្រធានាធិបតី។ សម្រាប់លោក Josh Earnest ការគំរាមកំហែងរបស់កូរ៉េខាងជើងមិនបានជួយដោះស្រាយបញ្ហាឲ្យចម្រើនទៅ មុខទេ ផ្ទុយទៅវិញ វារឹតតែធ្វើឲ្យស្ថានការណ៍កាន់តែដុនដាបទៅៗ។ អ្នកនំាពាក្យទី២របស់លោកអូបាម៉ារូបនេះដដែលបានរម្លឹកឡើងវិញថា នាពេលកន្លងមក រដ្ឋបាលអាមេរិកំាងធ្លាប់បានអំពាវនាវរបបក្រុងព្យុងយ៉ាងឲ្យបង្កើន ទំនាក់ទំនងល្អជាមួយបងប្អូនបង្កើតគូសត្រូវរបស់ខ្លួន គឺកូរ៉េខាងត្បូង ពិសេស ចាប់យកឱកាសល្អដែលរដ្ឋាភិបាលថ្មីរបស់ក្រុងសេអ៊ូលបានស្នើនា រយៈពេលចុងក្រោយនេះ។
ប្រតិកម្មរបស់លោក Josh Earnest ពេលនេះបានធ្វើឡើង បន្ទាប់ពីរដ្ឋអំណាចក្រុងព្យុងយ៉ាងបានប្រកាសគំរាមកាលពីថ្ងៃសុក្រ ម្សិលមិញថា នឹងធ្វើសង្រ្គាមនុយក្លេអ៊ែរទល់នឹងអាមេរិក និងកូរ៉េខាងត្បូង ការកាត់ផ្តាច់ខ្សែទូរស័ព្ទផ្ទាល់ជាមួយកូរ៉េខាងត្បូង ឬមួយក៏លុបចោលទាំងអស់នូវកិច្ចព្រមព្រៀងមិនឈ្លាន ពានជាមួយនឹងកូរ៉េ ខាងត្បូងជាដើម។ គឺជាការគំរាមដើម្បីឆ្លើយតបទៅនឹងទណ្ឌ កម្មថ្មីដាក់លើខ្លួនពី សំណាក់ក្រុមប្រឹក្សាសន្តិសុខអង្គការសហប្រជាជាតិ ទាក់ ទងនឹងការសាកល្បងនុយក្លេអ៊ែរលើកទី៣ដោយជោគជ័យកាលពីថ្ងៃទី១២កុម្ភៈ កន្លងទៅ។
គួរជម្រាបជូនថា ទោះបីជាកូរ៉េទំាងពីរ ជើង ត្បូងបានព្រមព្រៀងបញ្ឈប់សង្រ្គាមរវាងគ្នាតំាងពីជាងកន្លះសតវត្ស មកហើយក្តី ក៏ភាគីទំាងសងខាងនៅមិនទាន់បានចុះកិច្ចព្រមព្រៀងសន្តិភាពជាផ្លូវការ រវាងគ្នានៅឡើយទេ។ យ៉ាងណាក៏ដោយអ្នកនំាពាក្យក្រសួងការពារជាតិអាមេរិកបានធានាថា ទីក្រុង វ៉ាស៊ីនតោនបានត្រៀមខ្លួនរួចជាស្រេចដើម្បីការពារអធិបតេយ្យ របស់កូរ៉េខាង ត្បូង និងប្រទេសជប៉ុន ប្រឈមទប់នឹងគ្រប់ការវាយប្រហារជាយថាហេតុពីសំណាក់កូរ៉េខាងជើង។
ប្រតិកម្មក៏មានដែរ ពីអ្នកនំាពាក្យក្រសួងការបរទេសអាមេរិក លោកស្រី Victoria Nuland ដែលបានបរិហារពីការបង្ករឿងរបស់កូរ៉េខាងជើង។ យោងតាមលោកស្រី Victoria Nuland ទង្វើផ្គើនរបស់របបក្រុងព្យុងយ៉ាងមិនបានជួយធ្វើឲ្យចម្រើននូវ លក្ខខណ្ឌនៃជីវិតរស់នៅរបស់ប្រជាពលរដ្ឋ ឬមួយក៏បិទបញ្ចប់ភាពឯកាអាណាថារបស់កូរ៉េខាងជើងទេ ផ្ទុយទៅវិញ វាបានធ្វើឲ្យភាពតានតឹងកាន់តែកើនឡើងដែលជារឿងមួយគួរឲ្យ សោកស្តាយខ្លំាងណាស់៕ដោយ គួច គន្ធារ៉ា (RFI)