លោក ហ៊ុន សែន អំពាវនាវឲ្យ បណ្តាស្ថានីយ៍ ទូរទស្សន៍ រៀបចំកម្មវិធី ប្រលងចម្រៀង បុរាណ
ភ្នំពេញ៖ក្នុងឱកាសអញ្ជើញចូលរួមក្នុងទិវាវប្បធម៌ នាសាលសន្និសីទ ចតុមុខ កាលពីព្រឹកថ្ងៃទី៣ ខែមីនា ឆ្នាំ២០១៣ លោកនាយករដ្ឋមន្ត្រី ហ៊ុន សែន បានស្នើឲ្យ បណ្តាលស្ថានីយ ទូរទស្សន៍នៅកម្ពុជាទាំងអស់ គួរតែបង្កើតកម្មវិធីប្រឡង ប្រណាំងចម្រៀងផ្នែក បុរាណដើម្បីលើកស្ទួយ ផ្នែកនេះឲ្យមានការរីកចំរើន។
លោក ហ៊ុន សែន បានមានប្រសាសន៍ថា ប្រសិនបើនៅតាមបណ្តាស្ថានីយទូរទស្សន៍ក្នុងកម្ពុជា អាចបង្កើតកម្មវិធីប្រឡងចម្រៀងផ្នែកបុរាណខ្លះវាជាការល្អប្រសើរ ព្រោះបច្ចុប្បន្ននេះ ការប្រឡងចម្រៀង ការប្រកួតប្រជែងសម្រស់និងមានកម្មវិធីជាច្រើនដែលបង្កើតឡើងសម្រាប់យុវវ័យគឺមានចំនួនច្រើនលើសលុប ដែលអាចគ្រប់ដណ្តប់លើវិស័យចម្រៀងផ្នែកបុរាណ។
លោកបានបញ្ជាក់ថា «វាពេញនិយមកហើយ ខ្ញុំទទួលស្គាល់ថា វាពេញនិយមហើយ ដែលអស់លោក ប្រឡងបវកញ្ញា ស្រីស្អាត បុ្រសស្អាត និងបញ្ហាដទៃទៀត ក៏ប៉ុន្តែយើងជាជាតិសាសន៍មួយ ដែលចាំបាច់ត្រូវ មានមោទនភាព ដែលបង្កើតកម្មវិធីប្រឡងប្រជែងច្រើនណាស់នៅលើកញ្ចក់ទូរទស្សន៍ គួរតែបង្កើតកម្មវិធី ណាដែលអាចប្រើប្រាស់មួយម៉ោង ឬពីរម៉ោង ក្នុងមួយអាទិត្យដើម្បីប្រឡងប្រជែង ហើយចាំមួយឆ្នាំ ចាំឲ្យជាប់វាក៏មិនហួសពេលទេ»៕
