រាជរដ្ឋាភិបាល ចេញសារាចរ ទប់ស្កាត់ ការឆ្លងរាលដាល ជំងឺផ្តាសាយបក្សី
ភ្នំពេញ៖ នៅថ្ងៃទី០១ ខែមីនា ឆ្នាំ២០១៣នេះ រាជរដ្ឋាភិបាលកម្ពុជា សម្រេចចេញសារាចរ ស្តីពីវិធានការត្រួតពិនិត្យ និងទប់ស្កាត់ការឆ្លងរាលដាល ជំងឺផ្តាសាយបក្សី នៅគ្រាដែលជំងឺផ្តាសាយបក្សី H5N1 បានផ្ទុះឡើង នៅដើមឆ្នាំ២០១៣នេះ។
យោងតាមសារាចរ ដែលចុះហត្ថលេខាដោយលោក នាយករដ្ឋមន្ត្រី ហ៊ុន សែន បានឲ្យដឹងថា រាជរដ្ឋាភិបាល បានសង្កេតឃើញថា ទោះបីជាមានការចាត់វិធានការ ទប់ស្កាត់ដោយស្ថាប័នជំនាញក្តី ក៏ស្ថានភាពនៃការរាតត្បាត និងអត្រាមនុស្សស្លាប់ដោយជំងឺ ផ្តាសាយបក្សីមានកម្រិតគួរឲ្យបារម្ភ។
ដូចនេះក្នុងគោលបំណងធានា នូវសុវត្ថិភាពជូនប្រជាពលរដ្ឋ ឲ្យកាន់តែមានប្រសិទ្ធភាព រាជរដ្ឋាភិបាល សូមឲ្យក្រសួងកសិកម្ម រុក្ខាប្រមាញ់ និងនេសាទ ត្រូវបន្តជំរុញការអនុវត្តវិធានការចាំបាច់ និងជាបន្ទាន់ធានាដើម្បីបង្ការ និងទប់ ស្កាត់ការឆ្លងរាលដាល នៃជំងឺផ្តាសាយបក្សី ដោយត្រូវធ្វើការតាមដានស្រាវជ្រាវ យ៉ាងម៉ត់ចត់ និងជាប្រចាំលើសុខភាពបក្សី នៅទូទាំងប្រទេស និងត្រូវអនុវត្តវិធានជីវសុវត្ថិភាព វិធានអនាម័យនៅគ្រប់ទីកន្លែងចិញ្ចឹមបក្សី កន្លែងប្រមូលផ្តុំបក្សី និងទីផ្សារបក្សី។
ជាមួយនេះ ក៏ត្រូវពង្រឹងការត្រួតពិនិត្យអនាម័យសត្វ និងផលិតផលសត្វ ព្រមទាំងធ្វើការផ្សព្វផ្សាយទូលំទូលាយ តាមគ្រប់រូបភាពដល់ប្រជាពលរដ្ឋ ឲ្យបានយល់ដឹងអំពីជំងឺផ្តាសាយបក្សី និងចូលរួមអនុវត្តវិធានការការពារ។
សូមបញ្ជាក់ថា រហូតមកដល់បច្ចុប្បន្ននេះ ជំងឺផ្តាសាយបក្សី នៅប្រទេសកម្ពុជា ក្នុងរយៈពេលពីរខែដើមឆ្នាំ២០១៣ នេះជំងឺផ្តាសាយបក្សី H5N1 បានផ្ទុះនិងចម្លងទៅមនុសស្ស ៩នាក់ ក្នុងនោះមានមនុស្សបានស្លាប់ចំនួន ៨នាក់ ហើយគិតតាំងពីឆ្នាំ២០០៥មក មានមនុស្សឈឺចំនួន៣០នាក់ និងស្លាប់ចំនួន២៧នាក់ ដោយសារ ជំងឺនេះ៕
