យុវជនទីបេពីរនាក់ដុតសម្លាប់ខ្លួនឯងនៅក្នុងតំបន់ទីបេ
យុវជនទីបេពីរនាក់បានដុតសម្លាប់ ខ្លួនឯង នៅក្នុងខេត្តស៊ីឈ័ន ប្រទេសចិន ដែលជាតំបន់តែងតែកើតមានការតវ៉ាប្រឆាំងនឹងអំណាចរបស់ចិនមក លើទីបេ។ នេះបើយោងតាមការប្រកាសរបស់អង្គការក្រៅរដ្ឋាភិបាល ដែលតាមឃ្លាំមើលស្ថាន ភាពសិទ្ធិមនុស្សនៅទីបេ។ យើងសង្កេតឃើញថា ការដុតសម្លាប់ខ្លួនឯង គឺជាមធ្យោបាយថ្មីមួយ ដែលប្រជាជនទីបេតែងតែយកមកប្រើ ដើម្បីជាការតវ៉ាប្រឆាំងនឹងចិន។
យោងតាម អង្គការ International Campaign for Tibet (ICT) ដែលមានមូលដ្ឋាននៅរដ្ឋធានីវ៉ាស៊ីងតោនសហរដ្ឋអាមេរិក យុវជនទីបេពីរនាក់ ដែលបានដុត សម្លាប់ខ្លួនឯង កាលពីថ្ងៃអង្គារ មានអាយុ ១៧ឆ្នាំ និង១៨ឆ្នាំ គឺជាអតីតមិត្តរួមថ្នាក់ កាលពីនៅសាលាបឋមសិក្សា។ ហេតុការណ៍នេះបានកើតឡើង នៅក្នុងខេត្តស៊ីឈ័ន ដែលស្ថិតនៅប៉ែកខាងត្បូងឆៀងខាងលិចប្រទេសចិន ក្បែរតំបន់ស្វយ័តទីបេ ហើយជាខេត្តដែលសម្បូរទៅដោយជនជាតិទីបេរស់នៅ។
សាកសពរបស់យុវជនទីបេទាំងពីរនេះត្រូវបានក្រុមគ្រួសារដឹកយកទៅ ផ្ទះវិញហើយ ក៏ប៉ុន្តែ មិនប្រាកដថា ពួកគេអាចរៀបចំធ្វើបុណ្យសពទៅតាមទំនៀមទម្លាប់ទីបេបានទេ ពីព្រោះថា ជាទូទៅ អាជ្ញាធរចិនតែងតែហាមឃាត់មិនឲ្យមានការរៀបចំពិធីបុណ្យសពតាម ទំនៀមទម្លាប់ទីបេទេ ចំពោះជនទីបេណា ដែលយកការដុតសម្លាប់ខ្លួនឯង ដើម្បីជាការតវ៉ាប្រឆាំងនឹងអាជ្ញាធរចិន។
បើតាមរបាយការណ៍របស់អង្គការក្រៅរដ្ឋាភិបាល និងសកម្មជនសិទ្ធិមនុស្ស ករណីជនជាតិទីបេដុតសម្លាប់ខ្លួនឯង ឬប៉ុនប៉ងដុតសម្លាប់ខ្លួនឯង បានកើនឡើងរហូតដល់ ១០៤ករណីហើយ ចាប់តាំងពីឆ្នាំ២០០៩មក បើបូករួមជាមួយនឹងយុវជនទីបេទាំង២នាក់ចុងក្រោយនេះ។
ការដុតសម្លាប់ខ្លួនឯងនេះ ត្រូវប្រជាជនទីបេ ភាគច្រើនជាព្រះសង្ឃ និងដូនជី យកមកធ្វើជាមធ្យោបាយទាក់ទាញអារម្មណ៍សាធារណមតិជាតិ និងអន្តរជាតិឲ្យដឹងពីការតវ៉ារបស់ពួកគេ ប្រឆាំងនឹងអាណាព្យាបាលរបស់រដ្ឋាភិបាលក្រុងប៉េកាំងទៅលើតំបន់ទីបេ និងការគាបសង្កត់ពីសំណាក់អាជ្ញាធរចិនចំពោះសាសនា និងវប្បធម៌ទីបេ។ ទាំងនេះបើតាមការអះអាងរបស់ក្រុមអង្គការក្រៅរដ្ឋាភិបាល និងសកម្មជនសិទ្ធិមនុស្សទីបេ។
ក៏ប៉ុន្តែ ដោយសារតែតំបន់ទីបេ គឺជាតំបន់ ដែលអាជ្ញាធរចិនហាមឃាត់មិនឲ្យមានវត្តមានអ្នកសារព័ត៌មានបរទេស គេពិបាកនឹងបញ្ជាក់ឲ្យបានច្បាស់ថា តើការអះអាងរបស់អង្គការក្រៅរដ្ឋាភិបាល និងសកម្មជនសិទ្ធិមនុស្សនេះ គឺពិតជាត្រឹមត្រូវតាមភាពពិតជាក់ស្តែងត្រឹមកម្រិតណា?ដោយ សេង ឌីណា (RFI)
