ជនសង្ស័យម្នាក់លួចកាច់កម៉ូតូត្រូវសម្ថកិច្ចចាប់ខ្លួន
ភ្នំពេញ៖ កាលពីវេលាម៉ោង ២២និង២០នាទីយប់ ថ្ងៃទី១៧ ខែកុម្ភៈ យុវជនម្នាក់ លួចកាច់កម៉ូតូរបស់ប្រជាពលរដ្ឋ ត្រូវសមត្ថកិច្ច ឡោមព័ទ្ធ ចាប់ចូលគុកភ្លាមៗ នៅចំណុចផ្លូវលេខ២៣០ កែងផ្លូវ២២៣ ក្នុងសង្កាត់ផ្សារដើមគរ ខណ្ឌទួលគោក ។
យុវជនខាងលើនេះ មានឈ្មោះ អែម វី អាយុ១៨ឆ្នាំ ជាកម្មករអូសបន្លែនៅផ្សារដើមគរ ស្នាក់នៅមិនពិតប្រាកដ។ មុនពេលកើតហេតុស្ត្រីរងគ្រោះបានបញ្ឈរម៉ូតូម៉ាកសេ១២៥ ស៊េរី២០០៦ ទុកនៅចោលមុខផ្ទះ ខណៈនោះ ជនសង្ស័យឃើញឱកាសល្អក៏ចូលទៅកាច់កម៉ូតូ បម្រុងនឹងជិះរត់គេចខ្លួន ប៉ុន្តែត្រូវម្ចាស់ម៉ូតូឃើញទាន់ស្រែកឆោឡោបង្កឲ្យមានការ ភ្ញាក់ផ្អើល ដល់ប្រជាពលរដ្ឋ និងសមត្ថកិច្ចមូលដ្ឋានដែលកំពុងដើរល្បាត ជួយអន្តរាគមន៍ឡោមព័ទ្ធជនសង្ស័យយកទៅផ្ដន្ទាទោសតាមផ្លូវច្បាប់។
នៅចំពោះមុខសមត្ថកិច្ច ឈ្មោះអែម វី បានឆ្លើយថា ខ្លួនប្រព្រឹត្តិអំពើនេះ ទៅតាមពាក្យញុះញង់របស់បុរស២នាក់ផ្សេងទៀត សមត្ថកិច្ចបានកសាងសំណុំរឿងបញ្ជូនខ្លួនរូបគេទៅសាលាដំបូងរាជធានី ភ្នំពេញ ដើម្បីសុំឲ្យតុលាការធ្វើការសាកសួរ និងផ្ដន្ទាទោសទៅតាមច្បាប់៕ ហេង នាង
